Festiwal elektroniskeje hudźby z towaršnostno-politiskim podźělom

Miłoćicy (SN/bn). Festiwal Meta Solis je minjeny kónc tydźenja něhdźe 400 wopytowarjow k Miłočanskej skale přiwabił. Mjeztym sedmy raz wot towarstwa ze samsnym mjenom wuhotowane zarjadowanje pod hołym njebjom zahajichu Uta Šwejdźic kaž tež André a Michał Měrćink ze „za techno-festiwal skerje njewšědnej“ performance, w kotrejž předstajichu wuslědk dźěłarnički „Swobodne spěwanje w raju Krabata“ předchadźaceho festiwala Witaj. Z dohromady šěsć minimalistiskimi spěwami wotbłyšćowaše projektowy chór, kotryž bu w běhu prezentacije přiběrajcy wot publikuma podpěrany, wuswobodźenje drje najznaćišeje figury serbskeje mytologije z putow Čorneho młynka. Zakład tworješe powědančko Hendricha Jordana „Koklaŕski“, kotrež zhudźbnichu z powědarskeje perspektiwy kantorki Maruše. Wustup wudospołnichu widejowe projekcije, kiž běchu z pomocu kumštneje inteligency zhotowjene a zestajane. Performance bu awdiowizuelneje nahrawana a ma so přichodnje online spřistupnić.