Tysacy ludźi wužichu wčera składnosć, so na třećim zarjadowanju CSD w Budyšinje za prawa queernych wosobow, ale tež přećiwo prawicarjam wuprajić. Mjez nimi bě tež mnoho Serbow.

Budyšin (SN/MG). Zo budźe lětuši CSD w Sprjewinym měsće wulki, z toho su organizatorki a organizatorojo hižo dołho wuchadźeli. 4 300 wobdźělnikow běchu woni zličili, policija trochuje jenož na 3 000 ludźi­. Na podpěraćelskich demonstracijach zličichu zastojnicy něhdźe 400 wobdźělenych. „Smy jara spokojom. Wjace hač 4 000 ludźi, to je njesměrnje wulkotne znamjo za queerne žiwjenje tule na kraju“, praji jedyn z hłownych organizatorow, Jonas Löschau, po kóncu demonstracije.