Pod nadpismom „Projekt Mudra 2.0 abo Za čo trjebamy dźensa hišće nowy serbski słownik a kak ma tajki wupadać“ přeproša Maćica Serbska 21. oktobra na zjawny přednošk do Budyskeho Serbskeho domu. Referentka budźe dr. Katja Brankačkec. Bosćan Nawka je so z njej rozmołwjał.

Knjeni Brankačkec, što so za projektom chowa a wo kotry nowy słownik so jedna?

K. Brankačkec: Hižo před wjele lětami je slawist a přećel Serbow Jiří Mudra započinał, hesła za hornjoserbsko-čěski słownik zběrać. Jako w lěće 2009 zemrě, wopřijimaše jeho zapis nimale dwě třećinje alfabeta. Wot toho časa je tónle torso w jeho zawostajenstwje „drěmał“. Mjeztym mustwo fachowcow na nastork Towarstwa přećelow Serbow a dźakowano zjawnemu spěchowanju na nim dźěła.

Je da potrjeby za tajkule publikaciju?