Z dobrotami zlutniwje wobchadźeć
Budyšin (CS/SN). Zapósłanča CDU w zwjazkowym sejmje Marja Michałkowa bě wčera hósć Budyskeje sekcije hospodarskeje rady CDU, zo by wo swojim dźěle w sejmje rozprawjała a na prašenja wobdźělnikow wotmołwiła. Hospodarska rada CDU ma so za posrědkowarja mjez politiku a hospodarstwom. Marja Michałkowa mjez druhim powědaše, zo bě hakle njedawno ze zwjazkowym strowotniskim ministrom w USA. Tam je so wo digitalizowanju w strowotnistwje kraja wobhoniła. Dokelž kładźe wulku wažnosć na dialog z wobydlerjemi, wěnuje zapósłanča połojcu swojeho dźěłoweho časa dźěłu we wólbnym wokrjesu, połojcu časa je w Berlinje.
Byrnjež so hospodarstwo w Němskej tuchwilu derje wuwiwało a bjezdźěłnosć mała była, je Marja Michałkowa za to, z dobrotami za ludźi zlutniwje wobchadźeć. Wšako maja so tele dobroty tež w špatnych časach dale financować.
Trump so na Němsku wusypał
Obama ma poražku demokratki Clinton přeco hišće za móžnu
Youngstown/New York (dpa/K/SN). Kandidat republikanow na přichodne prezidentstwo USA Donald Trump we wólbnym boju prawdźepodobnje žanych přećelow njeznaje. Předstajejo w Youngstownje swój program wěstoty njeje wón jeno swój wotpokazliwy kurs napřećo připućowarjam zakitował, ale je samo před Němskej warnował. Po přeswědčenju Trumpa je zwjazkowa republika nastupajo wobchadźenje z ćěkancami přisamom špatny přikład. Po tym zo běchu so migranća z masami do Němskeje dóstali, je kriminalita w kraju runjewon šusknyła. A demokratiska riwalka Trumpa, Hillary Clinton, rěči za podobnu politiku připućowanja kaž němska kanclerka Angela Merkel. „Clinton chce so stać z ameriskej Angelu Merkel“, Trump wuwoła, złowěšćo dodawajo, „wam je znate, kajka katastrofa masiwne připućowanje za Němsku je.“ Katastrofa dźě je, zo je „kriminalita na niwow postupiła, kajkiž nichtó njeby za móžny měł“.
Šěri strašne łžě
Wjace bjezdźěłnych
Najhórši konflikt
16 jatych pušćili
To a tamne (16.08.16)
Nimale 13 hodźin na 30 metrow wysokim štomje wutrać dyrbješe pilot znjezboženeho ultralochkeho lětadła njedaloko Schwäbisch Gmünda, doniž jeho wohnjowa wobora njewuchowa. Muž bě wčera wokoło 20 hodź. znjezbožił a so we wjeršku štoma zapopadnył. Pomocnicy dyrbjachu lětadło najprjedy stabilizować, štož bě při nahłej skłoninje dosć naročne. Hakle dźensa rano móžachu znjezboženeho wuswobodźić. Byrnjež wonkownje njezranjeny był, dowjezechu jeho do chorownje. Lětadło su w běhu dnja ze štoma wzali. Přičina njezboža njeje znata.
30 centimetrow dołhu twjerdu kołbasu je 49lětny w Neubrandenburgu do awta 47lětneho ćisnył, po tym zo běštaj so zaparkowanja dla zwadźiłoj a sej wudma nadawałoj. Při tym so zadnje durje awta wobškodźichu. Policija nětko wosobinskeho ranjenja, hroženja a wobškodźenja wěcow dla přećiwo woběmaj přepytuje.
Wopory wopominali
Berlin (dpa/SN). Z wjacorymi zarjadowanjemi su zawčerawšim, sobotu, wopory Berlinskeje murje wopominali, kotruž běchu před 55 lětami, 13. awgusta 1961, twarić započeli. Na centralnym wopomnišću na Bernauskej dróze je knježacy měšćanosta Berlina Michael Müller (SPD) wěnc połožił. Něhdźe sto hosći, mjez nimi 50 swědkow časa, bě přitomnych. Do toho bě so Müller na wopominanskim zarjadowanju w Kapałce wujednanja w něhdyšim smjertnym pasmje wobdźělił.
Rozestajenja z policiju
Milwaukee. W měsće Milwaukee w zwjazkowym staće USA Wisconsin je wčera k rozestajenjam mjez roznjemdrjenymi demonstrantami a policiju dóšło. Nastork bě smjerć muža při policajskej kontroli. W běhu wječora so połoženje přiwótři, jako demonstranća awta, wobchody a tankownju zapalichu. Tež wutřěle běchu słyšeć, rozprawja powěsćernja dpa. Po informacijach policije bě 23lětny wobrónjeny muž před policiju ćěkał, na čož jeho zastojnik zatřěli.
System bankow wohroženy
