Projekty digitalizacije serbskeje rěče běža

Budyšin (SN/CoR). Po dołhej dobje financnych wuskosćow je so połoženje Załožby­ za serbski lud w minjenym času jara polěpšiło. Wosebje za digitalizaciju serbšćiny ma wona nětko přidatnje dohromady milion eurow k dispoziciji. Tak přewostaji Zwjazk załožbje klětu jónkrótnje 765 000 eurow a Sakska – započejo lětsa – hač do 2018 kóžde lěto 250 000 eurow. „Wosebitosć při tym je, zo móžemy pjenjezy za wužiwanje na přichodne lěta rozdźělić“, wjeseli so zastupjerka załožboweho direktora Michaela Mošowa. Formalnje spěchuje Zwjazk kóždy projekt z 50 procentami, tamnu połojcu ma kraj přinošować. „Prócujemy so tuž dale wo to, zo so tež Braniborska wobdźěli“, Michaela Mošowa podšmórny.