Strjažow – w tutej wsy njedaloko Choćebuza wuhotowa kantor Mato Rizo 1891 prěni serbski wjesny swjedźeń a z tym prěni serbski koncert w Delnjej Łužicy. Wjes předstaji so w nowej Pratyji z tójšto přinoškami. Delnjoserbska knižna protyka spomina so wě tež na jubileje 2026 kaž na 50 lět Němsko-serbskeho ansambla w Žylowje abo 75 lět delnjoserbskeho programa w rozhłosu. 26 awtorkow a awtorow je pisało za Pratyju, kotruž wobohaćeja dalše teksty z delnjoserbskeho pismowstwa – mjez nimi wot Strjažowskeho wučerja Riza ze stajnje aktualnej radu: Lěpše suche zjednanje dyžli tučne skorženje.

Chrósćicy (SN/MG). We wobłuku lětušeho předstajenja pasiona wotměwa so wot dźensa hač do soboty mjezynarodny kongres Europasion w serbskej Łužicy. Něhdźe 150 hosći z dwanaće krajow Europy, mjez druhim z Rumunskeje, Madźarskeje a Francoskeje na njón přijědu. We wobłuku kongresa wočakuja wobdźělnikow wjacore wjerški. Jedyn z nich budźe swjedźenska Boža mša z Drježdźansko-Mišnjanskim biskopom Heinrichom Timmereversom jutře, pjatk, w 17 hodź. w Chróšćanskej farskej cyrkwi. Na nju su tež zajimowani wěriwi přeprošeni. Po kemšach chcedźa štom sadźić, kaž je to hižo něšto lět na městnje kongresa z wašnjom, rěka w nowinskej zdźělence. Sobotu wotměje so kongres we wjacezaměrowej hali Jednota. Na nim so mjez druhim zapósłanc europskeho parlamenta Oliver Schenk (CDU) wobdźěli. Wječor sej wobdźělnicy zhromadnje ze sakskim ministerskim prezidentom Michaelom Kretschmerom (CDU) inscenaciju „Sćěhuj mje!“ wobhladaja. Je to prěni tajki kongres, kotryž w regionje zarjaduja. Z lěta 2017 su Serbja dźěl zwjazka Europasion­.

Malešecy (SN/bn). Knižna premjera w Ludowym nakładnistwje Domowina wudateje publikacije „W Malešecach před 200 lětami – Malschwitz vor 200 Jahren“ je wčera telko zajimcow přiwabiła, zo njewotmě so kaž předwidźane w stwičce, ale na žurli „Wódneho muža“ w Malešecach. W mjenje wjesnjanosty postrowi gmejnski radźićel Hagen Jurack a w mjenje župy „Jan Arnošt Smoler“ županka Leńka Thomasowa něhdźe sto wopytowarjow. Jednaćel LND Syman Pětr Cyž dźakowaše so wudawaćelce Trudli Malinkowej kaž tež wšitkim, kotřiž su na zwoprawdźenju knihi, wušłeje we wobłuku 800. jubileja wsy, sobu skutkowali. Malinkowa přizna, zo so jej hladajo na połnu žurlu „jazyk haći“, předstaji pak publikumej přiwšěm skrótka žiwjenski skutk Jana Awgusta Sykory (1835-1921), kotrehož dopomnjenki na dźěćatstwo žro dwurěčneje zběrki tworja. Dotal njewozjewjeny němski manuskript bě wona po dohromady nimale poł lětstotka trajacej zaběrje ze Sykoru pola prawnučki bywšeho fararja a wusahowaceho serbskeho ludoweho spisowaćela w Lipsku našła.

Inscenacija sobuskutkowacych zwjazuje a publikum zahorja

Bjez diskusije: Štož su akterki a akterojo po měsacy trajacych přihotach přewažnje čestnohamtsce zwoprawdźili, je wšeje česće hódne. Hač hrajerjo abo spěwarki, rejowarjo abo mustwje zwukoweje a wobswětlenskeje techniki, kopica simultanje přełožowacych abo nimale njeličomni njewidźomni pomocnicy za kulisami – pasionska hra „Sćěhuj mje!“ spjelnja wšě wočakowanja přihladowarstwa a trójna sława po premjerje bě bjezdwěla zasłužena. Předewšěm choreografije (Kornel Kolembus, Julia Kasyan) wědźa zahorjeć. Wušikne dźěło ze swěcu da wopytowarjej častodosć zabyć, zo inscenacija z jeničkim jewišćowym wobrazom (Mila Dźisławkec) wuńdźe. Krjudowanja předstajeja sobuskutkowacy dosć brutalnje, detaile přewostajeja přiwšěm fantaziji publikuma. Skutkownosći hry polěkuje hudźba, za kotruž su resp. běchu Jan Brězan-Hejduška, Jadwiga Kaulfürstowa, Helena Brězan-Hejdušcyna a Michał Cyž (tež wideja) zamołwići.