Milionaj za kulturu
Drježdźany (SN/bn). Kulturna załožba swobodneho stata Sakska spěchuje klětu w prěnim połlěće dohromady 200 projektow z cyłkownje něhdźe 2,1 milionom eurow. Po minjenu wutoru wozjewjenej lisćinje jedna so wo sparty hudźba (60 projektow), tworjace wuměłstwo (32), předstajace wuměłstwo (29), sociokultura (21), film (20), literatura (14) kaž tež wo sparty přesahowace projekty (13) a industrijnu kulturu (11). Dohromady bě 326 próstwow dóšło.
Dobru połojcu srědkow přewostaja něhdźe 80 projektam, kotrež maja so we wobłuku swjedźenskeho lěta „Židowske žiwjenje we wuměłstwje a w kulturje 2026“ zwoprawdźić. Ze stajnje 20 000 eurami spěchuja filmowy festiwal Nysa, Filmowy swjedźeń Drježdźany a Kamjeničanski festiwal dźěćaceho filma Schlingel. Wojerowskej Kulturnej fabrice přizwolichu 25 500 eurow za jubilejnu wustajeńcu kulturnišća kaž tež za zakónčenje akcije „Město rejuje“. Njebjelčanske towarstwo Kamjenjak dóstanje 35 000 eurow za projekt „Nowe horiconty – Generaciska změna a serbsko-němske kulturne formaty w dialogu“ a Oberlichtenauski ćah hercow 6 500 eurow za wobdźělenje na klětušich swětowych mišterstwach w Nižozemskej.
Zhromadny register na mjezynarodnym niwowje
Lisćina online: Wotnětka wothłosować
Budyšin (SN/bn). Doba wothłosowanja We wobłuku akcije „Hornjoserbske słowo lěta 2025 (HSSL)“ zahaji so z dźensnišim wozjewjenjom lisćiny namjetow. Hač do 27. decembra móža zajimcy swój hłós wotedać, a to pak z wotkazom na webstronje www.serbske-nowiny.de, pak z pomocu deleka wotćišćaneho qr-koda. Wuslědk wozjewja Serbske Nowiny (SN) w swojim silwesterskim wudaću.
Herbstwo Krawca zachować
Budyšin. Z bohateho hudźbneho tworjenja Bjarnata Krawca drje su jeho wuměłske spěwy mjenje znate. Na 80 tajkich bě Krawc za čas swojeho žiwjenja skomponował, zwjetša na teksty serbskich basnikow. Wudawaćel Ronald Hein je jědnaće kompozicijow Krawca na basnje Ćišinskeho zestajał a redigował. Z předležacej ediciju je nětko zajimcam spřistupnja.
Notowe wudaće zmóžnja (nic jenož profesionalnym) interpretam předstajenje spěwow na koncertach a druhich kulturnych zarjadowanjach, z čimž by so Krawcowe herbstwo hódnje zachowało.
Brigada a hosćo wospjet zahorili
Adwentny koncert 1. serbskeje kulturneje brigady je so wospjet jako publikum přićahowacy magnet wopokazał. Lětsa prezentowaše jón brigada ze syłu hosći w njewšědnje wulkej a wjacekróć měnjacej so wobsadce.
Region njezabyć
Ludowe wuměłstwo w swójbnej tradiciji pěstowała
Klětu wokoło jutrow wostanje jeje městno na wjacorych łužiskich jutrownych wikach a tež w Budyskim Serbskim muzeju prózdne. Dnja 23. nowembra bě ludowa wuměłča Edeltraut Gründelowa zemrěła. Za swoje wužrawane a škrabane jutrowne jejka ze serbskimi mustrami a hrónčkami bě Wojerowčanka daloko a šěroko znata.
Edeltraut Gründelowa narodźi so 13. februara 1949 we Wojerecach w starym měsće, kiž rozrosće bórze na srjedźišćo brunicoweje industrije. Jeje swójba měješe serbske korjenje. Mać Frieda Hawštynkowa pochadźeše z Ćiska a wowka Marja Bartušcyna chodźeše hišće we Wojerowskej serbskej drasće.
Edeltraut Gründelowa nawukny powołanje kucharki a dźěłaše w gastronomiji, najprjedy pola wikowanskeho drustwa HO, potom w zawodnej kuchni milinarnje Wjelcej a w Euro-šuli Wjelcej. Wjele lět wuwučowaše wučomnikow.
Mócny přiklesk gymnaziastam
1. serbska kulturna brigada znowa z adwentnym koncertom zahoriła
Budyšin (SN/bn). Tradicionalny adwentny koncert 1. serbskeje kulturneje brigady słuša k wjerškam ćělesa Serbskeho gymnazija Budyšin, kotryž lěto wob lěto syły wopytowarjow přiwabja. Njezadźiwa tuž, zo bě Budyska cyrkej Marje a Marty sobotu zaso połnje wobsadźena. Gymnaziastam poboku wustupi tójšto – zdźěla hóstnych – spěwnych solistow, instrumentalistow kaž tež po dlěšej přestawce zaso orchester, mjenujcy Serbska komorna filharmonija Serbskeho ludoweho ansambla. Cyłkowny hudźbny nawod měješe dirigentka Judith Kubicec.
Po pišćelowej improwizaciji Friedemanna Böhme zahajištej brigada a filharmonija popołdnjo, kiž bě zdobom jako hudźbna nutrnosć wuhotowane, z choralom „Knjeza chwal“ Johanna Heinricha Rolleho. W swojich witanskich słowach superintendent Krystof Rummel po tym wuzběhny, zo „je narod syna Božeho, na kotryž so tele dny hotujemy, stajnje z hłubokej přičinu nadźije a wjesela.“ Zdobom so wón wšitkim sobuskutkowacym za wuhotowanje tuteje hodźinki wjesela dźakowaše.
Kamjentny dom swójby přiwabił
Zběrka kwintetow wušła
Předležaca edicija prezentuje klarinetowe kwintety serbskich komponistow. Produkcija wopřijima twórby Hinca Roja, Ulricha Pogody, Jana Cyža a Lukaša Čórlicha. Z wuwzaćom Rojoweju kwintetow buchu hudźbne twórby za tutu CD skomponowane. Mjezynarodni hudźbnicy su je z wysokim hudźbnym narokom interpretowali, štož wudaća Rojec edicije wuznamjenja.
Na klarineće hudźi Daniel Roy, na 1. wiolinje Nicolas Dupont a Charlotte Chahuneau, na 2. wiolinje Abigél Králik a Vashka Delnavazi, na wioli Mathis Rochat a na violoncellu Ari Evana Konstantin Bruns. Fachowy tekst wo kompozicijach je dr. Georg Beck napisał.
