Budyšin (SN). W zwisku z dźěłowym wopytom pola agentury za koncepcionelne wuwiće wustajeńcow a medijow dr. Ulricha Hermannsa w Münsteru, pobyštaj direktorka Budyskeho Serbskeho muzeja Christina Boguszowa a kurator za kulturne stawizny a literaturu dr. Jędrzej Soliński w hakle loni w decembrje wotewrjenej nowej trajnej wustajeńcy muzeja „Dom stawiznow“ w Bonnje. Agentura w Münsteru přewodźuje nowu koncepciju trajneje wustajeńcy muzeja w Budyšinje. We wustajeńcy pod motom „Ty sy dźěl stawiznow – Němska wot 1945 (Du bist Teil der Geschichte – Deutschland seit 1945)“ informowaštaj so fachowcaj z Budyšina wo trendach koncepcionalneho, grafiskeho a medialneho předstajenja stawiznow. Jeju zaměr bě, sej wobraz wo tym stworić, na kotre wašnje hodźa so najwšelakoriše cilowe skupiny docpěć a stawizny plastisce zwobraznić.

Budyšin (CRM/SN). Hač na poslednje městno běše swjedźenska žurla Serbskeho muzeja njedźelu dopołdnja wobsadźena. Wjele dołhotrajaceho přikleska, stajnje znowa brawo-wołanje a teptanje z nohami – po wječornymaj koncertomaj pjatk a sobotu skónči so njedźelna finalna matineja z přemóžacym wuspěchom. Što běše so poskićiło, haj runjewon prezentowało? Wospjet běše 56lětna klasiska wiolinistka Franziska Pietsch z mjezynarodnym teamom wurjadnych solistkow a solistow tudy třidnjowski festiwal „Klasika w zymje“ zarjadowała. Eksil a iden­tita běštej tema předewšěm w njedźelnym koncerće z dźewjeć wuraznymi kompozicijemi a k tomu wjacorymi zwjazowacymi recitatami. Skupina wosom interpretkow a interpretow wopytowarstwu runjewon zapyri, za čož njemało owacijow žněješe.

Sobotu, 24. januara, je so w Praskim Serbskim seminarje sedmy raz ptači kwas wotměł. „Njemóžemy tutón nałožk dokładnje tak wuhotować, kaž je to w Serbach z wašnjom. Tuž smy swójsku wersiju wuwili,“ rjekny Eliška Oberhelová wot Towarstwa přećelow Serbow (SPL). W Praskej warianće přihotuja sej dźěći z papjery ptaču masku z pjerjemi, namoluja podkładk za sroki a chłóšćenki, nawuknu čěske spěwy z motiwami ptačkow – na přikład „Čižiku, čižiku“ – a z lampionkami běža spěwajo přez Karlowy móst. Tole je wjeršk zarjadowanja, wšako skupinu turisća z cyłeho swěta widźa, ju fotografuja a filmuja a so za pozadk nałožka zajimuja. Tón je turistiski přewodźer Pavel Kuča wot SPL mjez druhimi turkowskej swójbje wujasnił. „Wow, to je woprawdźe rjane a zmysłapołne“, měnješe zahorjena mać.

Čorny Chołmc (SN/MiR). Wot silwestra hač do apryla je dotal w Krabatowym młynje w Čornym Chołmcu měr knježił. Lětsa je tomu hinak. Kulturna managerka młyna Susann Wuško je so prašała, štož móhło domoródnych kaž tež turistow w zymje do młyna wabić. Wosebje z pomocu nowych medijow kaž tež na zarjadowanjach, kiž so kónc zašłeho lěta w młynje wotměchu, su za ptačokwasnu nowostku wabili. Wjace hač 80 zajimcow je so sobotu kaž tež njedźelu dopołdnja a popołdnju na štyrjoch dźěłarničkach wobdźěliło. Mjez nimi běchu hosćo z Blunja, Běłeje Wody, Tornowa, Wojerec a Bošec runje tak kaž z Lipska, Drježdźan, Ottendorf-Okrilla a ze Stendala, haj samo z Badensko-Württembergskeje. W Brězanowym domje zhonichu dźěći runje tak kaž jich starši, wowki a dźědojo wo serbskich drastach. Wosebje zajimowaše jich pyšna drasta katolskeje njewjesty. Tam słyšachu hosćo prěni króć tež słowa kaž sroka, hawron a ptači kwas. W běhu dwuhodźinskeho poskitka je wjackróć wospjetowachu a na kóncu běchu sej je kruće zašćěpili. W pjekarni wobdźělnicy zwěsćichu, zo njejsu jim dodawki za droždźowe ćěsto scyła cuze.