Budyšin (SN). Dohromady 90 młodostnych w starobje 8 do 18 lět z Budyšina a wokoliny je předwčerawšim w Dźiwadle na hrodźe projekt „Chcu domoj“ oficialnje zahajiło. Zaměr je, hač do klětušeho februara pod profesionelnym nawodom wjelestronski spektakl wuwić, kiž wopřijima elementy dźiwadźelenja, reje/pohiba, tworjaceho wuměłstwa, rěče/-ow, klankodźiwadła a hudźby. Cyły dźiwadłowy dom ma so z jewišćom stać. Přihladowarjow wočakuje kaleidoskop rozdźělnych předstawow, přećow a wobrazow domizny.

Planowane je, zo so młodostni tydźensce zetkawaja. Nimo toho su prawidłowne formaty wuměny předwidźane, kiž maja zetkanja z młodymi ludźimi zmóžnić, kotřiž maja pozadk migracije resp. ćěkanja. W srjedźišću steja transkulturne a intersocialne impulsy kaž tež zhromadne wuměłske dźěło z rozdźelnymi wuměłskimi srědkami a formami zwuraznjenja.

Budyšin (SN). Lětuši lětni kurs Serbskeho instituta (SI) za serbsku rěč a kulturu je wuknihowany. 43 zajimcow w starobje mjez 21 a 74 lětami z dźesać krajow je so za njón dohromady přizjewiło. Najwjace wobdźělnikow přińdźe z Němskeje, Pólskeje a Čěskeje. Dalši zajimcy su z Awstriskeje, Tadźikistana, Ukrainy a USA kaž tež ze Serbiskeje, Słowakskeje a Słowjenskeje. Něhdźe połojca wobdźělnikow hišće studuje. Dźěl kursantow chce so powołansce we wobłuku slawistiki ze serbšćinu zaběrać. Druzy maja wosobinske přičiny, kaž na přikład serbskich prjedownikow abo serbskeho partnera.

Poprawom měješe so doba přizjewjenja za kurs 1. meje skónčić. Tola wotpowědny formular je SI hižo dźeń prjedy z interneta wzał, dokelž běchu wšitke městna wobsadźene. Kurs wotměje so wot 24. julija do 8. awgusta w rumnosćach Serbskeho internata a Serbskeho gymnazija w Budyšinje.

Budyšin (SN/bn). Serwisowy klub Rotary Bautzen/Budyšin wuhotuje lětsa dalšu, chórowu akademiju. Za to pyta znowa za spěwarkami a spěwarjemi kóždeježkuli staroby, kiž „nochcedźa so snano kruće do ansambla integrować, ale rady raz na wobmjezowany čas w chórje sobu spěwać“. W srjedźišću ma wjeselo nad hudźbu a zhromadnym spěwanjom stać. Runočasnje spěchuje so dalekubłanje w hudźbnej teoriji a hudźbnych stawiznach. Nimo toho poskićuja zajimcam składnosć, za čas chórowych probow wosobinske hłosowe kubłanje přijimać.

Zaměr akademije je – nimo hižo mjenowaneho wjesela kaž tež šěrjenja wědy a kmanosćow w zwisku z hudźbu – 11. oktobra wuhotować beneficny koncert w Budyskej Michałskej cyrkwi, a to na dobro swětoweje kampanje we wobłuku programa „Polio Plus“. Z njej angažuje so zjednoćenstwo Rotary International pod hesłom „End Polio Now“ přećiwo spinalnej mortwicy (Kinderlähmung). Před lětomaj w Budyskej cyrkwi Marje a Marty wuhotowany, tehdyšu akademiju zakónčacy koncert na dobro dźěsćownje-syrotownje w Lwiwje bě nimale 5 200 eurow wunjesł.

Nowe serbske wuměłstwo je domizna Bernharda Schippera. Wustajeńca pokazuje nětko přehladku třoch lětdźesatkow skutkowanja wuměłca, kiž ma łužiske a serbske korjenje. Zašły štwórtk su ju oficialnje wotewrili.