Po horcych septemberskich dnjach bliži so nětko nazyma a tak tež čas nazymskich koncertow. Nimo dweju, kotrejž běštej hižo w aprylu a juniju we Worklecach a Radworju, čaka na přećelow chóroweho spěwanja wot 8. oktobra hač do 15. nowembra dohromady dwanaće koncertow w Hornjej a Delnjej Łužicy.

Budyšin (SN/CoR). Nazymske koncerty słušeja k tym projektam, kotrež Załožba za serbski lud w swojej zamołwitosći přewjeduje – a tu wotběži wšitko po přećach ludźi. Zo tomu tak bě, je a tež wostanje, wo to stara so hižo wjele lět Marija Swierczekowa jako hłowna organizatorka. ,,Spytam to zarjadować, štož sej Domowinska skupina, wjesne towarstwo abo tež jednotliwcy na městnje přeja“, praji Chelnjanka. Druhdy to wězo tak lochko njeje. „W Chrósćicach chcedźa ludźo hižo dawno muski chór Delany słyšeć. Přihotowany bě koncert za 16. oktober. Dirigent Handrij Henčl, zdobom tenor w chórje Serbskeho ludoweho ansambla, je pak powołansce po puću. Dokelž njemóža Delenjo bjez dirigenta wustupić, dyrbjachmy nowy termin namakać, a to budźe nětko 30. oktober“, organizatorka rozłožuje.