W Kamjenskej bibliotece ke knižnemu lěću lětsa nowy rekord docpěli

Kamjenc (SN/bl). Biblioteki zaběraja wažne stejnišćo při wukmanjenju čitanskich zamóžnosćow. Z pomocu akcije „Knižne lěćo – při čitanju so zanurju“, na kotrejž so dohromady 99 bibliotekow Sakskeje wobdźěla, spěchuja čitanje lochkeje dźěćaceje a młodźinskeje literatury tež zwonka šulskeho časa. Nimo měšćanskich knihownjow w Budyšinje, Woje­recach a Kulowje so tež Kamjenska Lessingowa biblioteka na akciji wobdźěla. Hižo šesty raz witaja wot spočatka lětnich prózdnin w knihowni nad Lessingowym muzejom dźěći w starobje jědnaće do 16 lět. „Lětsa je so cyłkownje 75 holcow a 36 hólcow z 15 wokrjesnych šulow přizjewiło, štož je nowy rekord“, praji Sabine Haufe, zamołwita sobudźěłaćerka projekta.