25 lět na dobro wědomostneho slědźenja a dźěła w praksy

Choćebuz (SN/MiR). Wulka ličba hosći wčera w Choćebuskim měšćanskim domje wobkrući njeparujomnu hódnotu Budyskeho Serbskeho instituta z jeho wotnožku w Choćebuzu. Renoměrowana institucija zhladowaše tam na 25. róčnicu wobstaća. Direktor instituta dr. Hauke Bartels witaše dweju ze swojich předchadnikow, prof. Helmuta Fasku a prof. Dietricha Šołtu, zastupjerjow politiki, komunow a dalšich serbskich zarjadnišćow. Wosebje pak dźakowaše so sobudźěłaćerjam za jich angažement. „Swjećić móžemy dźensa na jednym boku wobsahowje bohateho a njesprócniweho dźěła mjeztym přez lětdźesatki wozjewjenych wuslědkow slědźenja kumulěrowaneje wědy wo serbskej rěči a kulturje dla. Nimo toho je so nam, po tym zo bě institut w swojej eksistency wohroženy, poradźiło zhromadnje z krizy zesylnjeni wuńć.“ Swjedźenski rěčnik prof. Roland Marti z Posaarskeje uniwersity a wjelelětny předsyda wědomostneje přirady Serbskeho instituta skedźbni na wysoki wědomostny narok, kotryž institutcija spjelnja.