SJ Chrósćicy II –
SV Bretnig-Hauswalde 4:3 (2:1)
Zestawa domjacych: Hejduška (65. Klimant) – Donat, Bětnar, Dórnik, Wowčer, Dehn (44. Förster), Šmit, Handrik, Pjetaš, Jakubaš, Liznar
K prěnjej přećelskej hrě je sej Chróšćanske druhe zastupnistwo koparjow z Bretniga-Hauswalde njedźelu do swojeho stadiona pod Šibjeńcu přeprosyło. Při najwjetšej horcoće poradźi so domjacym hižo w 10. min. nawjedowanje po rjanym wuhraću přez Měrćina Jakubaša. Njekonsekwentneho škita dla wuruna přećiwnik z prěnjeje stafle wokrjesneje ligi dwě mjeńšinje pozdźišo z rjanej wolej-třělwu wot šěsnatki. Bul, kotryž lećeše runu smuhu do praweho kuta, běše tuž njedocpějomny za hewak sylneho wrotarja Fabiana Hejdušku ze swójskeho dorosta. Chróšćenjo pokazachu přiwšěm dale wjace angažementa a docpěchu krótko do přestawki 2:1 přez Mattija Bětnarja, kiž kulowatu kožu po róžku a wulkej šmjatańcy w šěsnatce do wrotow suny.