FSV Budissa Budyšin
– FSV Union Fürstenwalde 2:0 (0:0)
Zestawa domjacych: Ebersbach – Kunze, Patka, Hoßmang, Mack, Weiß, Ciapa, Treu (67. Krawčik), Schmidt, Schlicht (90. Merkel), Bönisch (87. Wockatz)
W dotalnych štyrjoch hrach přećiwo koparjam Fürstenwaldy njejsu Budyšenjo hišće połnje dypkować móhli. Po tym zo bě Budissa derje do noweje sezony startowała, měješe wona dosć sebjewědomja, plan tež zwoprawdźić.
Při tropiskich temperaturach mustwje hru měrnje zahajištej. Kevin Bönisch, kiž swjećeše tón dźeń narodniny, měješe prěnju šansu za domjacych. Hłójčkowany bul pak cil njenamaka (9.). Wolejtřělwa Niklasa Thiela wrotarjej Maikej Ebersbachej žane ćeže njenačini (15.). Dalšu składnosć za Budissu měješe Tony Schmidt, třělwa ze zdalenosće 35 metrow dźěše snadnje wyše łaty (19.). Hosćićel ćišć nětko zesylni. Po wólnym kopje Schmidta pak tež Bönisch kulowatu kožu porjadnje njetrjechi (30.). Poslednja składnosć za Budissu do přestawki nasta znowa po róžku Schmidta. Hłójčkowany bul Pavela Patki wrotar Paul Büchel wotwobara, a třělwu Mateusza Ciapy znješkódni Thiel (38.).