Schrift vergrößern
Myto Ćišinskeho spožčeja, tak rěka w statuće, „za wusahowace zasłužby na polu serbskeje kultury, wuměłstwa a wědomosće“. Marja Elikowska-Winklerowa dósta najwyše serbske wuznamjenjenje za swój žiwjenski skutk, a tónle skutk rěka Šula za Delnjoserbsku rěč a kulturu w Choćebuzu.
Telko lawreatow kaž lětsa na spožčenju Myta Ćišinskeho a Spěchowanskeho myta lědma wuhladaš. Marja Elikowska-Winklerowa (foto naprawo, prědku 3. wotlěwa), wuznamjenjena z hłownym mytom za swój angaže ment nastupajo Šulu za delnjoserbsku rěč a kulturu, je so w kruhu dorosta wočiwidnje derje čuła. Tež direktor Krajneho rozhłosoweho domu Sakskeje dr. Sandro Viroli (prědku nalěwo) bě do Pančic přijěł, zo by młodym kolegam Radija Satkula, mjez druhim Katce Pöpelec (prědku 3. wotprawa) a Matejej Cyžej (prědku naprawo) kaž tež nawodomaj młodźinskeje redakcije Andreji Chěžcynej (prědku 2. wotlěwa) a Handrijej Špitankej (2. wotprawa) gratulował. Swjatočnosć hudźbnje wobrubili su nimo pianistki Liany Bertók wiolinistka Annett Baumann a spěwarjej Mira Walerych Szary a Mikołaj Jan Walerych (foto nalěwo; wotlěwa).
Direktor Załožby za serbski lud Jan Budar, lawdator Jan Bělk, Handrij Špitank, Katka Pöpelec, Matej Cyž a Andreja Chěžcyna (wotl.) na přepodaću spěchowanskeho myta
Wulka bě delnjołužiska delegacija. Někotre žony běchu so za swjatočnosć narodnu drastu zwoblěkali. SN/Hanka Šěnec
