Šulske sportowe lěto 2019/2020 na Serbskim gymnaziju Budyšin (SGB) započa so loni w septembrje z tradicionalnym lochkoatletiskim swjedźenjom na Budyskej Młynkec łuce. Wubědźowanje w třiboju doby dwanatkar Fridtjof Schade z Budyšina z 317 dypkami. Druha najlěpša w běhanju, skakanju a kulostorku bě šulerka 9. lětnika Sarah Bauchec z Boranec z 298 dypkami. Třeće městno zawěsći sej aktiwna koparska sudnica, dwanatkarka Lea Krječmarjec z Wulkeho Wjelkowa z 292 dypkami. Tón dźeń docpě Fridtjof při storčenju pjeć kilogramow ćežkeje kule z 13,15 metrami nowy rekord na serbskim kubłanišću. Šulski rekord w lochkoatletiskim třiboju dźerži dale lońša maturantka Tereza Pöpelec z Chrósćic z grandioznymi 445 dypkami z lěta 2015.