Serbski institut, BTU a Institute for Heritage Management pruwuja potencial
Budyšin/Choćebuz/Zły Komorow (SN/CoR). Pod hesłom „LIL-studija swětowe namrěwstwo Łužica“ přepruwuja tuchwilu Serbski institut (SI), Braniborska techniska uniwersita Choćebuz (BTU) a Institute for Heritage Management (IHM) z Choćebuza w zhromadnym interdisciplinarnym projekće, hač maja łužiske krajiny po dobywanju wuhla potencial na titul swětoweho namrěwstwa. Iniciatiwa je dźěl wot zwjazkoweho ministerstwa za kubłanje a slědźenje spěchowaneho předewzaća za wuwiće struktury „Land-Innovation-Lausitz (LIL)“. Z 275 000 eurami podpěrowany projekt je z aktualnje dźesać sobudźěłaćerjemi minjeny měsac zaběžał a traje hač do decembra 2021.
