Sokoł Ralbicy/Hórki – Módro-běli Kulow 3:0 (0:0)
Zestawa domjacych: Schöne – Matka (69. Bejmak), Šewc, B. Heidorn, P. Šołta (46. Rawš), L. Heidorn (54. Woko), Bejma, Gloxyn, N. Šnajder, Šiman (54. Domaška), Hicka (75. Mjechela)
Zestawa hosći: Franz – Sauer, Langa (73. Katzer), Bergmann, Woko, Kisch (65. Pawlik), N. Čórlich, Nicolaides, Wittek, Koplanski, Wiedemann
Najrjeńše koparske wjedro přiwabi wčera popołdnju 200 přihladowarjow do Ralbičanskeho stadiona „Jurij Frencl“. Hosćom z Kulowa falowaše tójšto stajnych hrajerjow a Ralbičenjo dyrbjachu z Aleksanderom Wałdu wažneho aktera w defensiwje narunać. Trenar Krystof Gloxyn zasadźi kaž hižo minjene tydźenje swojich młodych, spěšnych hrajerjow. Stari zajacy kaž Pětr Domaška, Křesćan Bejmak abo Tomaš Rawš pak łakachu na ławce, štož so na kóncu tež wudani. W prěnim połčasu so wjele naspomnjenja hódneho njesta. Běše to spěšna hra bjez wulkich šansow. Ralbičan Leonhard Heidorn misny wrota jenož snadnje, na tamnym boku wuchowa Sokołow łata wrotow před zastatkom.
