Regularna koparska hra je po 90 mjeńšinach ke kóncej, wolejbulowa partija najpozdźišo po pjeć sadźbach a marathon stajnje po 42,195 kilometrach. Jako sej njedawno pjatk livestream sportoweho wubědźowanja Last Soul Ultra­ zaswěćich, njewědźach, hdy budźe wubědźowanje ke kóncej. Přeradźu to hnydom: To bě 67 hodźin po zahajenju. Wězo njejsym sej cyłe wubědźowanje wobhladał, ale kónc tydźenja přeco zaso raz na to pohladał, zo bych widźał, kelko sportowcow je hišće pódla.