HZ Mały Wosyk/Porchow II –

SJ Njebjelčicy 0:3 (0:0)

Zestawa hosći: Hahn – Hanuza, Wjerš, Herrmann (81. Heymann), Matješk (55. Čornak), Rudolf, Plaettner, Hrjehor, Bjeńš (81. Šiman), F. Domš (67. Lehmann), O. Domš

Na poslednju hru prěnjeje połserije dojědźechu sej Njebjelčenjo k něhdyšemu towarstwu­ swojeho trenarja Daniela Pohlinga.

Wote wšeho spočatka bě intensita wysoka a dwuboje běchu jara intensiwne. Na woběmaj bokomaj nasta wjele foulow. Mustwje běštej jenak nastajenej. Wobě spytaštej ze spěšnymi akcijemi doprědka přińć a z dołhimi bulemi wrota docpěć. Atraktiwnych stafetow a rjenje wuhratych šansow bě skerje mało. To zaležeše nic naposledk tež na špatnym trawniku, kiž bě hłuboki a njeruny. Na zakładźe wjacorych njewužiwanych šansow na woběmaj bokomaj wosta prěni połčas bjez wrotow. Njebjelčenjo pak mějachu w dotal wurunanej hrě nós zlochka prědku. Po foulu přećiwo Stefanej Bjeńšej w přećiwniskej šěsnatce měješe Plaettner samo šansu na nawjedowanje, a to z jědnatku. Zwrěšći pak na wrotarju, kiž bul wotwobara.