Zašły štwórtk běchu sej šulerjo Serbskeje wyšeje šule „Michał Hórnik“ Worklecy do Žitawy na regionalne mišterstwo we wolejbulu w starobneje klasy WK II, potajkim 2009 a pozdźišo narodźenych, dojěli.

Tu mějachu jako jenička wyša šula přećiwo třom gymnazijam wo wobdźělenje na sakskim finalu wojować. Přećiwnicy běchu šulerjo gymnazijow ze Žitawy, z Niskeje a ze Serbskeho gymnazija Budyšin (SGB). Hnydom prěnja hra přećiwo mustwu SGB bě kaž hra mjez přećelemi. Runje wona pak bě zdobom najćeši duel dnja. Na kóncu so Worklečanscy šulerjo 2:0 přesadźichu. Dalšej hrě přećiwo šulerjam ze Žitawy a z Niskeje dobychu Worklečenjo tohorunja 2:0.

Z tym kwalifikowachu so bjez přěhrateje sadźby w cyłkownym wubědźowanju. Njebjelčan Kilian Cyž bu jako najlěpši hrajer wubědźowanja wuznamjenjeny. Serbscy gymnaziasća z Budyšina dalšej hrě přećiwo Niskej a Žitawje dobychu a wobsadźichu z tym druhe městno. Wospjet zaměstništej so serbskej šuli na prěnimaj městnomaj w regionje wuchodna Sakska, štož na wunošne dźěło we wučbje, w cyłodnjowskich poskitkach a towarstwach pokazuje.