Zymske poměry na dróhach njejsu zahoritosć za kopańcu w Hornjej Łužicy minjenu sobotu zlemić móhli. Sportowa jednotka Njebjelčicy bě mjeztym štwórty raz halowy koparski turněr starobneje klasy młodźiny E (U 10/U 11) zarjadowała. Tójšto přihladowarjow chcyše tute mocyměrjenje we Worklečanskej sportowni dožiwić. Na tribunje wutwori so tuž rjana kulisa za hrajerjow z wokolnych serbskich towarstwow na hrajnišću. Cyłkownje wosom mustwow z Chrósćic, Ralbic, Pančic-Kukowa, Radworja a wot hosćićelskeho towarstwa z Njebjelčic bě přeprošenje sćěhowało.

Hižo po zahwizdanju prěnjeje hry w 10 hodź. bě pytnyć, zo młode talenty na parkeće nikomu ničo darić nochcedźa. W napjatych, ale stajnje fairnych duelach wojowachu wo kóždy bul. Hry dohladowachu třo Njebjelčanscy dorostowi sudnicy Maksimilian Hojer, Pius Čornak a Metod Pawlik. Mjeztym zo Křesćan Bejmak jako halowy rěčnik turněr přewodźeše, postarachu so starši Njebjelčanskich dorostowych koparjow z wulkim angažementom wo pohosćenje wopytowarjow.