Bamž powoła kardinalow
Vatikan (B/SN). Prěni raz bu duchowny ze Šwedskeje za kardinala powołany. Bamž Franciskus wozjewi pomjenowanje biskopa Andersa Arboreliusa ze Stockholma za kardinala. Dale chce wón 28. julija na kardinalow pozběhnyć biskopow Jeana Zerbo (Bamako, Mali), Juana Jose Omella (Barcelona), Louisa-Mariju Ling Mangkhanekouna (Pakse, Laos) kaž tež swjećaceho biskopa Gregorija Rosu Chaveza (El Salvador).
Ćěkancy su witani
Lipsk (B/SN). Pod hesłom „Dóšli – přiwzaći“ wotmě so we wobłuku ewangelskeho cyrkwinskeho dnja w Lipsku lětuši zetkawanski dźeń za wusydlencow. Na dwurěčnej Božej słužbje w Mikławšowej cyrkwi wuzběhny krajny biskop Carsten Rentzing zwólniwosć, na nowych městnach a daloko wot domizny znowa započinać. „Wy sće žiwy přikład za to, štož mjenujemy integraciju“, Rentzing podšmórny, „lubosć Boža nas dźerži – wšojedne na kotrym městnje.“ Loni je 325 ćěkancow do Sakskeje přišło, lětsa dotal 52.
Tilich přihłosuje dialogej z AfD
Tež dźěći wobkedźbować?
Drježdźany. (dpa/SN). Bayerski nutřkowny minister Joachim Herrmann je swój namjet zakitował, tež dźěći w ekstremnych padach wot wustawoškita wobkedźbować dać. „To pak su wuwzaća“, rjekny politikar CSU dźensa w rozhłosu. W islamistiskim wobłuku su minjene lěta tež njepołnolětnych k namócnym njeskutkam našćuwali, abo dźěći su so same radikalizowali, Herrmann potwjerdźi. Jeho namjet je tež tema na konferency nutřkownych ministrow Němskeje, wotměwacej so hač do jutřišeho w Drježdźanach.
Mórske rženje wjes zničiło
Athen (dpa/SN). Ćežke mórske rženje w Egejskim morju je wjes Vrisa ze 700 wobydlerjemi na grjekskej kupje nimale dospołnje zničiło. 80 procentow wšitkich twarjenjow je so sypnyło, kaž zamołwići za škit přećiwo katastrofam w Athenje zdźěleja. Jedna wosoba je žiwjenje přisadźiła, jědnaće ludźi so zrani.
Jednanja znowa zwrěšćili
Próstwana dobro Serbow
Jednanja bórze zahajić
Mocy za Łužicu zjednoćić
Zhromadne posedźenje sakskeho a braniborskeho krajneho knježerstwa
Rań (dpa/SN/MkWj). Krajnej knježerstwje Sakskeje a Braniborskeje stej dźensa wo přichodźe Łužicy wuradźowałoj. Na zhromadnym kabinetnym posedźenju w Ranju (Großräschen) rěčachu mjez druhim wo přichodźe brunicy, wo zasydlenju nowych předewzaćow, wo nawróće wjelkow a nic naposledk wo zachowanju serbskeje rěče a kultury. W běhu dnja chcyštaj sakski ministerski prezident Stanisław Tilich (CDU) a jeho braniborski kolega w zastojnstwje Dietmar Woidke (SPD) zjawnosć wo wuslědkach informować.
To a tamne (13.06.17)
Zazłobjeny jědnaćelětny hólčec je w durinskim Saalfeldźe zasadźenje policije zawinił. Wón bě doma twochnył, dokelž nochcyše jemu mać hrajku kupić, kotruž sej hólc přeješe. Policija na to po cyłym měsće hodźiny dołho a samo z psom za nim pytaše, doniž jeho skónčnje na ławce njenańdźe. Jim hólc jenož rjekny, zo přeje sej Fidget Spinner, nowu trendowu hrajku, kotruž bě w interneće widźał.
Defekt na zadnjej wósce 56 lět stareho traktora je jězbu jako „trecker-Willi“ znateho rentnarja Winfrieda Langnera do Pětrohroda přetorhnył. Kaž jeho dźowka medijam zdźěli, je narunanski dźěl mjeztym po puću do ruskeje eksklawy Kaliningrada, dokalž bě jeje nan minjeny tydźeń dojěł. 81lětny Langner bě so 20. meje z traktorom a małym bydlenskim wozom na puć nastajił. 5 000 kilometrow dołha jězba ma štyri měsacy trać.
Zwólniwym krajam pomhać
Berlin (dpa/SN). Němska chce afriskim krajam, kotrež su k reformam zwólniwe, přidatnje 300 milionow eurow přewostajić. Tole je zwjazkowy wuwićowy minister Gerd Müller (CSU) w telewiziji ARD připowědźił. Při tym dźe hłownje wo bój přećiwo korupciji, wo lěpšu transparencu a wo zachowanje čłowjeskich prawow. Wuprajenja Müllera steja w zwisku z dźensa zahajacej so konferencu wjacorych afriskich statnych šefow w zwjazkowej stolicy Berlinje.
Namołwja k njeposłušnosći
Barcelona (dpa/SN). Na wulkozarjadowanju na dobro ludoweho wothłosowanja wo samostatnosći španiskeho regiona Kataloniskeje je koparski trenar Josep „Pep“ Guardiola ludźi k ciwilnej njeposłušnosći napřećo centralnemu knježerstwu namołwjał. „Wothłosujemy 1. oktobra wo našim přichodźe, byrnjež španiski stat tole nochcył“, rjekny wón wčera něhdźe 30 000 demonstrantam w Barcelonje. Ministerski prezident Mariano Rajoy bě wospjet rjekł, zo budźe so wotpačenju hospodarsce najsylnišeje kónčiny kraja ze wšěmi srědkami wobarać.
Gabriel: Hrozy wójna
