Na městnje so wobhonili
To a tamne (10.03.17)
Wo medicinsku pomoc za swojeho knjeza je so we Weimarje pos postarał. Tak tón w bydlenju tak wótře šćowkaše, zo susodźa skónčnje policiju wołachu. Podarmo zastojnicy za durjemi bydlenja klinkachu. Přiwołana klučowa słužba durje wočini, a pod łožom nańdźechu dospołnje wopiteho muža. Jeho dowjezechu do chorownje a psa do zwěrjatownje.
W běhu jednoho měsaca 100 kilogramow wotbyła je po wšěm zdaću najćeša žona swěta, Egyptowčanka. Spočatk februara běchu ju w specielnje wuhotowanym nakładnym lětadle do indiskeho Mumbaija dowjezli. Nětko zdźěla tamniša Saifee-klinika, hdźež běchu so lěkarjo wo 500 kilogramow ćežku žonu starali, zo je masiwnje wotbyła. Pomhali su jej při tym medikamenty a wosebita dieta, přez kotrež je hłownje wodu w ćěle zhubiła.
Gabriel w ruskej stolicy
Moskwa (dpa/K/SN). Němski wonkowny minister Sigmar Gabriel (SPD) přebywa dźensa w Moskwje. Hłowna tema rozmołwow z jeho kolegu Sergejom Lawrowom a prezidentom Wladimirom Putinom je chromjacy měrowy proces na wuchodnej Ukrainje. W konflikće mjez proruskimi mocami a Kijewskim knježerstwom posrědkujetej Němska a Francoska. Gabriel a Lawrow dojednaštaj so na to, wobkedźbowansku misiju OSZE na wuchodźe Ukrainy zesylnić.
Chce w Europje wustupić
Istanbul (dpa/K/SN). Turkowski prezident Recep Tayyip Erdoğan wotmysli hišće do referenduma srjedź apryla w jeho kraju wo dwělomnym prezidialnym systemje w Europje wustupić. Nadrobnosće k tomu wón žane njemjenowaše. W statnym telewizijnym sćelaku TRT je Erdoğan miliony Turkow we wukraju naležnje namołwił wolić hić, wšojedne „kajkich zadźěwkow je“.
AfD předpołoži wólbny program
Mjeztym zo móžachu nowinarjo minjenej dnjej najnowše wuwića ...
Wažny wjeršk EU wohroženy?
Merkel wabi za Europu
Zrudny Budyšin!
Přisydlenje rjadować
Zhorjelski wokrjes nastaja so na dołhodobny koncept integracije
Hornja Łužica (AK/K). Na přisydlenje dalšich ludźi z Pólskeje a Čěskeje kaž tohorunja migrantow z wukraja wotmysli so Zhorjelski wokrjes z dołhodobnym integraciskim konceptom nastajić. „Tajki koncept ma na wšitke žiwjenske wobstejnosće připućowarjow dźiwać a jich prawa a winowatosće wopřijeć“, zwurazni krajny rada Bernd Lange (CDU). „Při tym dźe mjez druhim wo nawuknjenje němčiny, zaměstnjenje dźěći w pěstowarni resp. šuli a starosć wo swójby“, wón k tomu wuswětli. Předewšěm ma so wužadanjam w róžku třoch krajow wotpowědować. Trěbna je wulka syć, kiž wobsteji z přisłušnych zarjadow wokrjesa a z komunow a kotraž připućowarjow zaměrnje přewodźa.
W měsće prewenciju skomdźili
Budyšin (SN/CoR). Dyrbiš so w Budyšinje prawicarskich ekstremistow bojeć? Je połoženje w sprjewinym měsće za normalneho wobydlerja mjeztym wohrožace? A što hodźi so přećiwo tomu činić? Tele prašenja stejachu wčera w srjedźišću stajneho blida měšćanskeho zwjazka CDU w Budyskej piwarni. Jeho předsyda Tobias Schilling bě sej jako hłowneho hosća přeprosył historikarku Annalenu Schmidt, kotraž bu čestnohamtskeho angažementa za ćěkancow dla hižo někotre razy wohrožena. Z policajskeho wida rozprawještaj nawoda Zhorjelskeje kriminalneje policajskeje inspekcije Axel Teichmann a hłowny kriminalny komisar Dietmar Jurk ze Zhorjelskeho policajskeho statneho škita.
To a tamne (09.03.17)
Po 960 dnjow trajacej swětowej jězbje z oldtimerom nawróći so přichodnu njedźelu prominentna 79lětna předawarka awtow Heidi Hetzer zaso do Němskeje. 24. julija 2014 bě sona wona ze swojim ameriskim oldtimerom z lěta 1930 do Azije, Awstralskeje a Nowoseelandskeje dale přez Sewjernu a Južnu Ameriku do Afriki nastajiła. Dožiwiła je, kaž sama praji, wšudźe wutrobnu hospodliwosć a wjesołych ludźi.
Wopačny wopor wupytał je sej rubježnik z dwěmaj pomocnikomaj w Berlinje. Po nadpadźe na 23lětneho muža prošeše tón naraz policiju wo pomoc. Jako wopor mjenujcy rubježnistwo pytny, ćěrješe roznjemdrjeny za paduchom, kiž dósta prawdźepodobnje paniku. Z telefonatom na policiju wšak so wón zdobom přeradźi. A ta jeho nachwilnje zaja.
