Washington/Moskwa (dpa/SN). Prezident USA Donald Trump a ruski prezident Wladimir Putin chcetaj jutře prěni króć telefonować. Rěčnik Krjemla Dmitrij Pjeskow je po informacijach ruskich powěsćernjow wotpowědne rozprawy medijow USA wobkrućił. „Wuchadźam z toho, zo prawje bórze k rozmołwje dóńdźe“, rjekny Trump wčera wječor sćelakej Fox News. Trump bě stajnje zaso připowědźił, zo chcył poměr k Ruskej polěpšić.­ Byrnjež Putina wosobinsce njeznał, je sej wón wěsty, zo by dobry poměr mjez USA a Ruskej woběmaj krajomaj tył. „Dźěłamy hromadźe a zničimy teroristisku milicu IS.“ Tež Ruska so lěpšeje nalady mjez Moskwu a Washing­tonom nadźija. Z Trumpowym předchadnikom Barackom Obamu běchu so poćahi na najniši staw po kóncu zymneje wójny wochłódnili. Konflikty w Syriskej a na Ukrainje je jara poćežowachu. Moskwa je aktiwitow NATO na wuchodźe Europy dla znjeměrnjena.

Berlin (dpa/SN). Přichodny kanclerski kandidat SPD Martin Schulz wobradźa swojej stronje rozmach. Bychu-li zajutřišim, njedźelu, wólby zwjazkoweho sejma byli, móhła so SPD wo tři na 24 procentow polěpšić. Přiwšěm by daloko za CDU wostała, kotraž by 36 procentow nažnjała. To je wuslědk najnowšeho „politbarometra“ sćelaka ZDF. Tak sej 44 procentow ludźi Angelu Merkel (CDU) dale za kanclerku přeje, Martina Schulza pak 40 procentow.

Wopity šofer nakładneho awta je na awtodróze A 4 njedaloko Berbersdorfa spał. Kaž policija zdźěli, bě wón minjenu nóc swoje awto z warnowanskej swěcu na nabóčnej smuze wotstajił a sej wusnył. Hakle­ po wospjetnym kłapanju a wołanju zastojnikow wón wotući. Kontrola alkohola wunjese pola 29lětneho 2,10 promilow. Jeho jězbnu dowolnosć tuž nablaku sćazachu. Nakładne awto dyrbjachu wotwlec dać.

Zo by so alkoholowej kontroli wuwinył, je so wodźer wosoboweho awta we Wodowych Hendrichecach wčera wječor zabarikaděrował. Přez wusku škałbu wokna bě zastojnikam papjery z awta sunył. Woni wšak alkohol čujachu a sej žadachu, zo ma wulězć. 42lětny pak durje zamkny. Po dorěči ze statnym rěčnikom policisća nabóčne wokno awta rozbichu, a muž w awće so hižo njewobaraše.

London (dpa/K/SN). Britiske knježerstwo je dźensa parlamentej předpołožiło naćisk zakonja, nastupacy deklaraciju k wustupej kraja z Europskeje unije. Zapósłancam předležitej tuž tekst zakonja a časowy plan. Wothłosować wo zakonju chce knježerstwo dać hišće do kónca měrca.­ Potom wotmysli premierministerka Theresa May EU informować wo wustupje swojeho kraja ze zhromadźenstwa a zahajić jednanja wo brexiće.

Mawt dlěje njekritizować

Berlin (dpa/SN). Bayerska CSU sej žada, zo měła CDU přestać planowany popłatk za wosobowe awta kritizować. „Přesadźimy mawt – wotpowědnje europskemu prawu a bjez poćežowanja němskim šoferam“, rjekny generalny sekretar CSU Andreas Scheuer powěsćerni dpa. Tak njesměli mawt tež w swójskich rjadach dlěje kritizować. Posaarska mi­nisterska prezidentka Annegret Kramp-Karrenbauer (CDU) a městopředsydka zwjazkoweje CDU Julia Klöckner běštej sej polěpšenja za wukrajnych šoferow w němskich pomjeznych kónčinach žadałoj.

Gauck: Europu zachować