Terminy sej wotrěčeć
To a tamne (23.01.18)
Pjaneho pilota předewzaća British-Airways je policija bjezposrědnje do wotlěta pasažěrskeje mašiny zajała. Zastojnicy wotwjedźechu 49lětneho direktnje z cockpita Boeing 777 na lětanišću Gatwick. Muž bě jednomu z třoch pilotow jědnaćehodźinskeho lěta na Mauritius napadnył, dokelž za alkoholom smjerdźeše. Mjeztym je zaso na swobodźe. Mašina móžeše z dwuhodźinskim zapozdźenjom startować, po tym zo běchu druheho pilota namakali.
Hoberska zličbowanka je štyrjoch turistow z Japanskeje w hosćencu we Venedigu chětro rozhoriła. Woni dyrbjachu za štyri steaki, fritěrowane mórske płody a wodu 1 100 eurow zapłaćić. Mjeztym je měšćanosta Venediga Luigi Brugnaro připowědźił, zo chcył „wohańbjacy podawk“ pruwować. A dyrbjało-li so to wobkrućić, wón zamołwitych pochłosta.
Skutk podpěruje projekty
Paderborn/Drježdźany (B/SN). Ze 14 milionami eurow podpěruje Bonifacijowy skutk lětsa projekty w němskej, sewjeroeuropskej a w baltiskej diasporje. Z toho wužiwaja 225 000 euro za twarske a saněrowanske dźěła w biskopstwje Drježdźany-Mišno. Pomocny skutk zasadźa so za to, katolikow w diasporje we wěrje sylnić a jim dožiwjenja w zhromadnosći wěriwych zmóžnić. Financne srědki wužiwaja mjez druhim za zdźerženje cyrkwjow a wosadnych centrow, za dušepastyrstwo dźěći a młodostnych, za socialnokaritatiwne akcije a za spěchowanje projektow k skrućenju wěry.
Łaćonsku Ameriku wopytał
Vatikan (B/SN). Bamž Franciskus přebywaše wot 15. do 21. januara w Chile a Peruwje – w krajomaj, kotrejž stej so po wojerskej diktaturje a awtokratiji pomału zaso zhrabałoj. Wonej stejitej na dypku přewróta a takrjec na křižnišću towaršnostneho přichoda. W prěnim rjedźe wustupowaše bamž na swojej jězby jako dušepastyr, stej dźě tam dwě třećinje ludnosće katolskej. Přiwšěm njeje so do nutřkowneje politiki krajow měšał.
Katedralu poswjećili
Njesprawnosć dale přiběra
Davos (dpa/SN). Do zahajenja swětoweho hospodarskeho foruma w šwicarskim Davosu warnuje organizacija Oxfam před přiběracej hospodarskej njesprawnosću na swěće. Ta wohroža towaršnosće a demokratije. Štóž je chudy, so na politiskich procesach njewobdźěla abo woli protestne strony, rjekny fachowča organizacije Ellen Ehmke powěsćerni dpa. Po zwěsćenju Oxfam wobsedźi 42 wosobow na swěće runje telko kaž 3,7 miliardow chudych ludźi. Najbohatši jedyn procent wobsedźi wjace hač zbywace 99 procentow ludźi.
Kardinal bamža kritizował
Rom/Boston (dpa/SN). Jedyn z najwažnišich społnomócnjenych bamža za škit dźěći před znjewužiwanjom je Franciskusa toho wuprajenjow w zwisku ze znjewužiwanjom w Chile kritizował. Kardinal Sean O’Malley, nawoda bamžowskeje komisije za škit dźěći, rjekny, zo su wšelake wuprajenja swjateho wótca za čas jězby po Chile woporam splažneho znjewužiwanja „žórło wulkeje bolosće“. Bamž je wumjetowanja, zo bě chilski biskop Juan Barros pedofilneho duchowneho škitał, jako „wočornjenje“ wotpokazał.
„Shutdown“ dale traje
Jednanja wo koaliciji nětko spěšnje zahajić
Berlin (dpa/SN). Po snadnym rozsudźe wurjadneho zjězda SPD za zahajenje koaliciskich jednanjow z CDU a CSU chcedźa so wšitcy wobdźěleni spěšnje do rozmołwow dać, zo bychu knježerstwo wutworili. Hižo dźensa wječor je rozmołwa zwjazkoweje kanclerki Angele Merkel (CDU) a předsydy CSU Horsta Seehofera z předsydu SPD Martinom Schulzom planowana. Při tym chcedźa nawodźa stron najprjedy raz organizatoriske prašenja za jednanja rozrisać a časowy plan wobzamknyć.
Dopołdnja je frakcija SPD w zwjazkowym sejmje wurjadne posedźenje wotměła. CDU a CSU stej so tohorunja schadźowałoj a zhromadnu strategiju wothłosowałoj. Merkel a Seehofer wuradźowaštaj z frakciskimaj nawodomaj a generalnymaj sekretaromaj. Koaliciske jednanja maja so hišće tónle tydźeń zahajić, byrnjež dokładny čas spočatnje znaty njebył.
Klepsch: Dobre zhromadne dźěło
Drježdźany (dpa/SN). Wulka spokojnosć sakskich pacientow z chorownjemi w swobodnym staće je po słowach ministerki za strowotnistwo Barbary Klepsch wuslědk dobreho zhromadneho dźěła wšěch wobdźělenych. Rozsudne za najlěpši wuslědk po wšej Němskej su „chorownje ze swojim wulkim zasadźenjom, chorowniske a zarjadniske towaršnosće z mudrym postupowanjom a Swobodny stat Sakska ze swojim planom klinikow, kotryž so na pacientow a zdobom na eficientnu syć chorownjow orientuje“, rjekny politikarka CDU w Drježdźanach. Wona na to dopominaše, zo je Sakska wot lěta 1991 wjace hač pjeć miliardow eurow do chorownjow inwestowała.
Po najnowšim woprašowanju Bertelsmannoweje załožby, kotrež su kónc tydźenja wozjewili, chcyło 81,7 procentow wšitkich sakskich pacientow chorownju, w kotrejž su přebywali, dale poručić. To je najlěpši cyłozwjazkowy wuslědk, kaž załožba zdźěla. „Na to móžemy woprawdźe jara hordźi być“, Barbara Klepsch wuzběhny.
Schulz zesłabjeny
Sym podpisał, dokelž ...
... mějach w dowolu w Španiskej zajimawu rozmołwu z młodym baskiskim porikom. Žona bydleše dlěši čas w Londonje a tež Lipsk dosć derje znaje. Na prašenje, što wo prócowanjach wo njewotwisnosć w swojej baskiskej domiznje dźeržitaj, dóstach njewočakowanu wotmołwu: „Tam angažuja so jenož ludźo, kotřiž kraj hišće ženje wopušćili njejsu.“ Wuprajena distanca młodeju Baskow mi dźensa wuwědomja, kak wažne je wobydlersku iniciatiwu Minority SafePack podpěrać. Etniske mjeńšiny trjebaja pomoc na europskej runinje. Jenož tale zhromadnosć móže kraje Europskeje unije wobwliwować, zo ze swojimi awtochtonymi mjeńšinami runohódnje wobchadźa.
To a tamne (22.01.18)
Čerstwe stopy w sněze su policistow w Kielu direktnje k schowej dweju paduchow wjedli. Mužej běštaj so do hosćenca zadobyłoj a tam pjenježnu kasetu pokradnyłoj. Alarmowa připrawa wubudźi 38lětneho wobsedźerja hosćenca, kiž na to rozbite wokno wuhlada. Přiwołani zastojnicy wšak spóznachu při rozbitym woknje čerstwe stopy w sněze. Dyrbjachu je tuž jenož přez wjacore dróhi hač k pincy jednoswójbneho domu slědować, a hižo paduchow z rubiznu mějachu: W kasy pak njebě ani dźesać eurow.
Ze spakosćenym mobilnym telefonom sam fotografował so je paduch w Berlinje. Do toho bě so do bydlenja zadobył, hdźež pokradny pjenjezy a handy. Mjeztym je policija internetny kontakt k handyjej nawjazała a wobrazy namakała. Nětko proša wo pokiwy, štó móhł to być.
Merkel pola Macrona
Paris (dpa/SN). Zwjazkowa kanclerka Angela Merkel (CDU) je so dźensa do Parisa podała. Tam chcyše so wječor z francoskim prezidentom Emanuelom Macronom zetkać. Wažna tema je bližaca so 55. róčnica podpisanja přećelskeho Élyséeskeho zrěčenja z Němskeje z Francoskej. Rěčeć chcetaj wo europsko-politiskich a mjezynarodnych prašenjach. Élyséeske zrěčenje wo mjezsobnym přećelstwje běštaj zwjazkowy kancler Konrad Adenauer a francoski prezident Charles de Gaulle 1963 podpisałoj.
Wo přićahu swójbnych rěčeli
Berlin (dpa/SN). Zwjazkowy nutřkowny minister Thomas de Maizière (CDU) je so dźensa w zwjazkowym sejmje za to wuprajił, we wukraju bydlacym swójbnym ćěkancow dale zakazać do Němskeje přińć. Na prěnim wuradźowanju wo naležnosći wšak minister zdobom přilubi, zo chcył přićah swójbnych za něšto měsacow zaso dowolić. Nutřkowna politikarka SPD Eva Högl rjekny, zo jeje strona naćiskej jeno přihłosuje, hdyž w nim 31. julij 2018 jako datum, po kotrymž je přićah zaso dowoleny, kruće zapisaja.
Zeleny tydźeń zahajeny
