Zjawny zajim za šule
Zběrka Sodanna bjez přichoda
Staucha (dpa/SN). Biblioteka Petera Sodanna w Staucha w Mišnjanskim wokrjesu zhladuje na njewěsty přichod. Wot lěta 2018 so knihownja jako powšitkownje wužitne drustwo organizuje. Jej pobrachuje pak kóždežkuli spěchowanje Zwjazka abo swobodneho stata, skorži předsyda dohladowanskeje rady Bernd Pawlowski. Biblioteka žiwi so wot pjenježnych darow, tola tež te raznje woteběraja.
„Mamy samsne problemy kaž wšitcy druzy“, rjekny wudowa Sodanna, Cornelia Brenner-Sodann. Pobrachuja pjenjezy za personal, kotryž móhł skład knihow přehladać a katalogizować. Antikwariat drje hišće něšto dochodow ma, te pak lědma pomhaja.
Mysličku za zběrku knihow měješe dźiwadźelnik Peter Sodann (1936–2024). Wón chcyše knihi z časa NDR před zničenjom a zabyćom wuchować. Po jeho smjerći pak steješe biblioteka spěšnje před prašenjom: Kak dale? Pomhała by mała, ale wobstajna podpěra 100 000 eurow wob lěto. Z njej móhli pomocnikow zapłaćić. Sakske knježerstwo pak „žane zjawne knihownje njepodpěruje“.
Znowa bombu při mosće našli
Drježdźany (dpa/SN). Při rumowanju powostankow wottorhaneho Carolinoweho mosta w Drježdźanach su wčera znowa bombu z Druheje swětoweje wójny namakali. Policisća kónčinu wokoło strašneje namakanki zaraćichu a fachowcow za wotškódnjenje stareje municije wołachu, policajska direkcija zdźěla.
Po prěnim posudku je to 250 kilogramow ćežka bomba britiskeho pochada. Wona nosy zapalak, tohodla dyrbja ju na městnje znješkódnić. Tole chcychu dźensa w běhu dnja sčinić. Do toho dyrbješe 17 000 wobydlerjow centrum města nachwilnje wopušćić.
Při wottorhanju Carolinoweho mosta su w běhu krótkeho časa wjacore bomby z Druheje swětoweje wójny namakali. Z časami běchu fachowcy za wotškódnjenje municije bagrownikam cyły dźeń jako poradźowarjo poboku.
13. februara 1945 su britiscy a ameriscy bombowcy centrum města nad Łobjom skoro dospołnje zničili. Na wšěch 25 000 ludźi je tehdy swoje žiwjenje přisadźiło. Stajnje zaso namakaja při twarskich dźěłach w sakskej stolicy bomby, kotrež njejsu rozbuchnyli.
Nowa hala za jězdźidła železnicy
To a tamne (06.08.25)
Wo 1 400 kilogramow přećežki bě transporter na awtodróze A 7, jako jón zastojnicy kontrolowachu. Nan a syn běštaj požčeny wóz za přećah z Bayerskeje do Bremena napakowałoj. Policistam je awto napadnyło, dokelž je zadni dźěl hižo chětro přewisował. Waha na parkowanišću pokaza 4 900 kilogramow město dowolenych 3 500. Šoferej hrozy chłostanka 235 eurow a dypk w Flensburgu.
Dokelž je pawiany w Nürnbergskim zwěrjencu morił, hroža direktorej nětko ze smjerću. Dźesać konkretnych hroženjow su policiji sposrědkowali, direktor Dan Encke zdźěli. W socialnych medijach kopja so njekonkretne hroženja. Tež z listami abo mejlkami jemu hroža. W zwěrjencu su minjeny tydźeń dwanaće pawianow morili, dokelž bě jich wobhrodźenje přepjelnjene. Nichtó nochcyše wopicy přewzać, tohodla dyrbjachu je zasparnić.
FDP pyta za nowym pućom
Berlin (dpa/SN). Po swojej poražce we wólbach zwjazkoweho sejma hotuje so FDP na nowe wobsahowe wusměrjenje. K tomu zahaja dźensa woprašowanje čłonow wo jich politiskich starosćach a wočakowanjach. W tym zwisku planuja, woprašowanje tež na politisce zajimowanych rozšěrić, kotřiž njejsu z čłonom strony. Na wólbach zwjazkoweho sejma 23. februara bě FDP ze 4,3 procentami zwrěšćiła a njeje z toho časa wjace w němskim parlamenće zastupjena.
Bolsonaro dyrbi do aresta
Brasilia (dpa/SN). Najwyše sudnistwo Brazilskeje je za bywšeho prezidenta Jaira Bolsonara domjacy arest wukazało. „ Wukazane naprawy přećiwo Jairej Bolsonarej su ranjenje, na tym njedwělujemy“, sudnik Alexandre de Moraes zdźěli. Mjez brazilskimi prawicarjemi hidźeny sudnik je bywšemu statnemu šefej zakazał, zo socialne medije za politiske zaměry wužiwa. Najebać to je Bolsonaro politisku debatu w kraju zaměrnje w socialnych syćach wobwliwował, Moraes zwěsća.
Žadyn zakaz social-media
Plastowe wotpadki zanjerodźa tež dróhi města Nouakchott w ...
AfD w Sakskej dale na čole
Drježdźany (dpa/SN). Bychu-li přichodnu njedźelu w Sakskej wólby krajneho sejma byli, by AfD jasnje jako najsylniša móc wušła. To je wuslědk tak mjenowaneho „njedźelneho prašenja“ wjacorych sakskich nowin a slědźenskeho instituta Civey, kotrež měsačnje přewjeduja.
AfD ma z 35 procentami hłosow dale jasny předskok před CDU, kotraž by 27 procentow docpěła. Lěwica je z dźesać procentami třeća najsylniša moc. BSW ma dźewjeć, SPD a Zeleni matej kóžda šěsć procentow. FDP by runje tak hišće jedyn procent dóstała. Z dźěłom ministerskeho prezidenta Michaela Kretschmera je jenož hišće 40 procentow wolerjow spokojom, 43 procentow je njespokojnych. Na wšěch 18 procentow ludźi njeje so rozsudźić móhło.
