Z wulkotnej powěsću su zamołwići regio­nalneho koparskeho ligista FC Ener­gija (FCE) Choćebuz fanow ­pře­kwa­pili. Kapitan Axel Borgmann je swo­je zrěčenje w Choćebuzu podlěšił.

Tak budźe 27lětny, kiž je wot spočatka sezo­ny swoje mustwo stajnje jako kapitan na kopanišćo wjedł, z FCE tež do noweje sezony 2022/2023 startować. Před Borgmannom su tež hižo Jonas Hildebrandt, Tobias Eisenhuth a Arnel Kujović připrajili dlěje za FCE hrać. Z dalšimi wukonliwymi koparjemi, kaž z Maksimi­lianom Proničewom, Erikom Engelhardtom a Tonijom Stahlom, dyrbja přichodne dny rozmołwy wjesć.

W prěnjej dypkowej hrě lěta 2022 je Ener­gija Kamjeničanskemu FC snadnje z 0:1 podležała. Přichodnu dypkowu hru změja koparjo FCE w regionalnej lize­-sewjerowuchod 3. apryla pola FC Eilenburga. Georg Zielonkowski

FC Energija Choćebuz – SV Babelsberg 03 2:0 (2:0)

Zestawa domjacych: Stahl – Hasse, Böhmert, Hildebrandt, Borgmann, Erlbeck, Eisenhuth, Geisler (78. Juckel), Proničew (63. Mäder), Zografakis (90. Kremer), Engelhardt

slěd wrotow: 1:0 Zografakis (30.), 2:0 Engelhardt (36.)

FC Energija Choćebuz je z 2:0 wuspěchom přećiwo mustwu regionalneho ligista­ SV Babelsberg 03 krajne pokalne finale Braniborskeje docpěła. To samsne poradźi so koparskemu cyłkej VfB Kśišow. Zastupjer wyšeje ligi-juh ze wsy w gmejnje Gołkojce, něhdźe 12 kilometrow wot stadiona FCE zdalena, přesadźi so tež z 2:0 přećiwo MSV Neuruppinej z wyšeje ligi-sewjer. Tak wuhrajetej susodaj 21. meje finale wo krajny pokal.

FC Energija prezentowaše w prěnim połčasu najlěpšu hru w minjenych tydźenjach a nawjedowaše z 2:0. Šansy za wyši mjezywuslědk do přestawki nastachu mnohe, tak zo njetrjebaše so přiwisk FC Energije wo zaćah do finala starosćić. Tola po přestawce nasta před 4 200 přihladowarjemi runohódna hra. Škit hosćićela pak swójske wrota wuběrnje škitaše.

VfB Kśišow – MSV Neuruppin 2:0 (2:0)

Jesse Marsch a RB Lipsk: To běše raz. Jenož pjeć měsacow je rodźeny Američan Marsch Lipšćanow trenował. A hačrunjež dyrbjał wón swět wokoło cyłeho sportoweho kompleksa firmy­ RedBull jako něhdyši trenar w Salzburgu a New Yorku cyle derje znać, je wón poměrnje zahe w Lipsku zwrěšćił. Sam sym Marscha w Lipsku někotre razy na kopańcy widźał. Ně, nic w stadionje pola RB. Ale w tak mjenowanej „Soccerworld“. Je to gigantiska něhdyša wikowanska hala­, do kotrejež su dźewjeć mjeńšich ko­parskich polow z kumštnym trawnikom zatwarili. Kóžde polo skutkuje kaž tajka małka koparska klětka. Cyle tunje to drje njeje, hdyž sej tam z přećelemi dóńdźeš, za to pak móžeš so jako měšćan tež w zymje idealnje w suchim wucychnować. A ru­nje tam sym loni kónc lěta Marscha widźał. Je sej tam runje tak kaž ja ze swojimi brjuchatymi přećelemi kopańcu zahrał. Jako „gajgl“ takrjec. Narěčeć a wo interview za Serbske Nowiny jeho poprawom chcył njejsym: „Njech sej tam ze swojimi kumplemi zahraje“, sej prajach.