Widźał, słyšał, napisał (29.03.21)
Hłowny sportowy wučer Serbskeho gymnazija Budyšin Měrko Korjeńk je dźensa jedyn z lětušeju nowačkow w mustwje Widźał-słyšał-napisał.
„Serbscy sportowcy su na polu wolejbuloweho sporta w Budyskim wokrjesu pioněrske dźěło wukonjeli“, pisa dołholětny redaktor Sokołskich Listow Mikławš Krawc we wudaću čo. 1/2009 a podawa hruby přehlad wuwića wolejbuloweho sporta w Serbach. Złožujo so na přinošk Pětra Šołty w Sokołskich Listach čo. 3/1994 rysuje wón spočatki nawuknjenja noweje sportoweje družiny w susodnej Čěskosłowakskej na Varnsdorfskim Serbskim gymnaziju. W zajimawym přinošku rozprawja Šołta (sam sobuhrajer) wo grandioznym wuspěchu serbskich wyšich šulerjow 1951, jako stachu so ze sakskim šulerskim mištrom we wolejbulu. Woni hrajachu taktisce mudrje z dwěmaj nadběhowarjomaj, štož bě nowe. Wšako delnje wotwobaranje bulow (bagrowanje) dowolene njebě. Tule techniku su hakle Češa 1958 na europskich mišterstwach pokazali.
Sport (26.03.21)
Megapochod přesunjeny
Megapochod wobornikow ma nowy termin. Planowany bě wón tónle kónc tydźenja. Nětko su zarjadowarjo a wuhotowarjo Harald Skopi (Dobrowólna wohnjowa wobora Narć), Robert Novy (wjesny předstejićer Narć) a Diana Franke-Skopi tak mjenowany darowanski pochod we łužiskim rewěrje na 2. a 3. oktober přesunyli. Jedna so tu wo ćah wuchowanskich mocow, kotrež zběraja pjenjezy za towarstwo Paulinchen z.t. a za organizaciju FeuerKrebs, kotraž stara so wo powšitkowny dźěłowy a strowotniski škit 1 200 000 wobornikow po cyłej Němskej. Wšitke informacije za 112 kilometrow dołhi pochod bjez wubědźowanskeho charaktera steja na www.feuerwehrspendenmarsch.de. Přizjewjenja za jednotliwcow a skupiny su pod www.baer-service.de dale móžne.
Dźensa wonka, njedźelu doma
Łužiske lodohokejowe liški chcedźa dźensa w Freiburgu přećiwo tamnišemu EHC dypkować a njedźelu doma přećiwo Sokołam z Heilbronna. Wšitke hry DEL 2 pokaza internetny sćelak sprade.tv.
26.03. 19:30 EHC Freiburg –
Łužiske liški
28.03. 17:00 Liški – Sokoły Heilbronn
Dwójce play-off za DSC
Andrew Clark w sakskim lodohokejowym derbyju štyri razy trjechił
Łužiske liški Běła Woda – Lodowe lawy Drježdźany 5:3 (1:3, 2:0, 2:0)
Eksistuja tajke dny, zo so ći wšitko radźi. Andrew Clark, lodohokejist z Běłeje Wody, je runje tajki přećiwo sakskemu kontrahentej z Drježdźan dožiwił. Štyri razy trjechi wón do čorneho a bě tónraz z wulkim wotstawkom tak mjenowany „matchwinner“.
Drježdźanscy lodowe lawy do hry lěpje startowachu a docpěchu přećiwo letargiskim Łužiskim liškam hižo po třoch mjeńšinach nawjedowanje. Jeno 27 sekundow na to domjacy wurunachu. Tim Detig wuspyta so z centralneje pozicije a třěli puk do wrotow. Drježdźanjenjo njedachu Liškam wotnětka žadyn wokomik k předychanju. Samo z mužom mjenje na polu wuhrachu sej lěpše šansy a docpěchu tak w 11. min. tež zasłužbne druhe wrota. W powerplayju traješe po tym jenož někotre sekundy, a hižo steješe 3:1 za hrajerjow ze sakskeje stolicy. Běłowodźenjo běchu kompletnje w hinašim swěće a móžachu so swojemu wrotarjej Mac Carruthej a žerdźi jeho wrotow dźakować, zo njesteješe po 20 mjeńšinach hižo 1:5.
„Snano budźe motiwacija pobrachować“
Měsacy dołho nětko hižo dźěći w towarstwach za bulom honić njesmědźa. Clemensa Matika, koordinatora dorosta a runočasnje trenarja młodźiny E Módro-běłych Kulow, tale situacija tohorunja chětro poćežuje. Z kotrymi sćěhami wón liči a kak swojich chowancow motiwować spyta, to je wón Wernerej Müllerej přeradźił.
Knježe Matiko, kak drje budźe so pandemija na mustwa a cyłe towarstwo přichodnje wuskutkować?
C. Matik: Je jara ćežko někajke prognozy mjenować. Hdyž so wšitko zaso zahaji, móžu na prašenje wotmołwić. Dorosćenych nastupajo so boju, zo tón abo tamny wjace motiwowany dosć njebudźe so wobstajnje na treningu a hrach wobdźěleć. Pola dźěći tónle strach njewidźu.
Maće kontakt k swojim chowancam?
C. Matik: Přez WhatsApp-skupiny wudźeržuju zwisk ze staršimi a hrajerjemi. Prašam so, kak so jim wjedźe a spytam na te wašnje socialny kontakt dźeržeć. Za dźěći je tónle čas njesměrnje napinacy, wšako so tež zetkawać njesmědźa. Njeměnju jenož na trawniku, ale tež hewak wšědny dźeń.
Što sće činił, zo bychu so mali sportowcy dale motiwowali?
Sponsoring na amaterskej runinje
Tež holcy zaso trenuja
Bjez dypka domoj jěli
Bietigheim Steelers – Łužiske liški Běła Woda 3:2 (0:0, 2:2, 1:0)
Dnjej po štwórtkownym domjacym dobyću přećiwo Bad Tölzej podachu so chowancy Běłowodźanskeho lodohokejoweho trenarja Chrisa Strauby do Bietigheima. Mustwo z Badensko-Württembergskeje słuša k top pjeć cyłkam w tabulce, štož wšak wone wot spočatka tež pokaza. Prěnja třećina słušeše po hrajnych podźělach kaž tež po ličbje šansow jemu. Tola hosćo sylnje zakitowachu a dźeržachu so hač do prěnjeje přestawki z 0:0.
Po wulkim boju a zastatkuBayerow tola hišće přewinyli
Łužiske liški Běła Woda – Tölzske lawy 5:4 po podlěšenju (1:0, 1:2, 2:2, 1:0)
157 mjeńšin lodohokejisća z Bad Tölza hižo žane přećiwniske wrota přijimali njeběchu a nimo toho su w minjenych šěsć hrach stajnje jako dobyćer z lodu šli. Faworit bě do duela z Hornjołužičanami tuž jasny. Wšitko wupadaše za tym, zo pojědu hrajerjo z Bayerskeje tež tónraz jako dobyćer domoj. Wšako hišće štyri mjeńšiny do kónca 4:2 nawjedowachu. Tola w lodohokeju móže so w běhu jenož někotrych sekundow tójšto změnić. A tak sta so tež w liščej jamje.
Tölzske lawy startowachu lěpje do hry, nawjedowanje pak so jim w prěnich mjeńšinach njeporadźi. Čim dlěje hra traješe, ćim lěpje so domjacy do partije namakachu, a počasu ju samo dominowachu. Tak dźěchu po wrotach Thomasa Reichela w 13. min. tež z 1:0 zasłužbnje do prěnjeje přestawki.
Wosom sekundow po znowazahwizdanju postara so čěski hrajer Tomáš Andres z rjanej třělwu do hornjeho kuta wo 2:0. W 30. min. hosćo w powerplayju najprjedy skrótšichu, prjedy hač pjeć mjeńšin na to wurunachu.
Slěbro sej wudobyli
Test dobyli a noweho sportoweho direktora předstajili
FC Energija Choćebuz –
FSV Optik Rathenow 3:2 (0:1)
W měšćanskim dźělu Choćebuza Dešanku (Dissenchen) testowachu koparjo Energije druhi raz w běhu jenož někotrych dnjow: tónkróć přećiwo direktnemu staflowemu konkurentej z Rathenowa. Hosćom poradźichu so jara dobre kombinacije, a tak woni w 31. min. tež prěni raz wyskachu. Jeničku prawu móžnosć na stronje hosćićela pak njezamó Max Kremer přetworić. Šěsć mjeńšin po znowazahwizdanju zwyši Rathenow samo na 2:0, tola poněčim jeho mocy popušćichu. To su chowancy trenarja Dirka Lottnera w poslednjej štwórć hodźinje za sebje wužili a troje wrota třělili. Felix Brügmann (76.), Axel Borgmann (82.) a narodninar Felix Geisler (83.) hru woprawdźe zwjertnychu, štož 75 mjeńšin dołho scyła za tym njewupadaše.
Přećelsku hru wobhlada sej tež Maximilian Zimmer. 28lětny něhdyši kopar Energije je po třoch torhnjenych křižnych paskach swoje kopački na hozdźik powěsnył a je nětko nowy sportowy direktor Choćebužanow. Georg Zielonkowski
