Widźała,słyšała, napisała (20.09.21)
Kónc tydźenja wotmě so zaso tójšto sportowych zarjadowanjow, tak tež jěchanski turněr na a wokoło sportnišća w Hórkach. Hižo 28. raz organizowaše tam konjace sportowe towarstwo Při Klóšterskej wodźe Pančicy-Kukow jěchanske wubědźowanja. Tež lětsa ležeše fokus na přezpólnym jěchanju kaž tež při wuhotowanju sakskich mišterstwow. Tójšto přihladowarjow a lubowarjow konjaceho sporta bě do Hórkow přijěło.
Skónčnje zaso tři dypki žnjeli
ST Ćisk – SJ Chrósćicy 1:4 (0:1)
Zestawa hosći: Králíček – L. Zahrodnik, M. Zahrodnik, Sentivan, F. Zahrodnik, Wornar (62. Mützner), Runt, G. Zahrodnik, Matješk (85. Mark), Krawc (70. Zynda), Bogusz
Sobotu podachu so Chróšćanscy koparjo do Ćiska. Po dwěmaj poražkomaj chcychu chowancy Pavela Runta skónčnje zaso raz tři dypki žnjeć. Domjacy so wot spočatka hry hłuboko do swójskeje połojcy stupichu. Tak mějachu hosćo mnoho rumow w srjedźnym polu, kotrež su wužiwali a spěšnych nadběhowarjow zasadźili. W 17. min. so Pawoł Krawc na lěwym křidle derje přesadźi a chcyše poprawom Jana Bogusza w šěsnatce posłužić. Tola zakitowar bě před nim a suny bul k 0:1 do hóstnych wrotow. Chróšćenjo dale dominowachu a na dalše wrota tłóčachu. Přeco zaso móžachu so Krawc, Bogusz a Franc Matješk přesadźić, njeběchu pak zmužići dosć swoje móžnosće doskónčnje k wrotam přetworić. Domjacy běchu stajnje po zmylkach hosći w srjedźnym polu strašni, ale njemóžachu sej žane jasne šansy nadźěłać. Na tamnej stronje móhli Chróšćenjo rezultat hišće w prěnim połčasu zwyšić, stajnje pak móžachu domjacy tomu w poslednim wokomiku hišće zadźěwać.
Sport (17.09.21)
Na konjacy sport
W Hórkach přewjedźe konjace sportowe towarstwo Při Klóšterskej wodźe Pančicy-Kukow jutře a njedźelu swój 28. jěchanski turněr. Na programje steja mj. dr. 8. Hórčanske mustwowe wubědźowanje, sakske mišterstwa w mnohostronskim jěchanju we wotewrjenej klasy a 3. Hórčanski derby. Wobaj dnjej su wurisanja wot ranja hač do popołdnja.
Hnydom štyri koparske derbyje
Na hornjej kaž tež delnjej koparskej runinje dotal wšitko bjez wjetšich problemow běži. Hinak je tomu w regionalnej lize-sewjerowuchod, hdźež hraje FC Energija Choćebuz. Cyłk Tennis Borussije Berlin móžeše dotal na přikład jeničce pjeć wot dźesać hrow přewjesć, FC Energija a 1. FC Lokomotiwa Lipsk šěsć.
18.09. 13:00 Wojerowski FC II
– SJ Njebjelčicy
18.09. 15:00 Rakečanske ST
– BSV 68 Sebnitz
18.09. 15:00 ST Ćisk – SJ Chrósćicy
18.09. 15:00 FSV Łuty – SJ Chrósćicy II
19.09. 11:30 Sokoł Ralbicy/Hórki II
– SJ Njebjelčicy II
19.09. 14:00 Sokoł Ralbicy/Hórki
– TSV Połčnica
19.09. 14:00 ST Marijina hwězda
– Módro-běli Kulow
19.09. 15:00 Módro-běli Minakał
– ST Radwor
Worklečanki derje přihotowane
Dypk doma kruće dźerželi
SJ Njebjelčicy – Traktor Malešecy 1:1 (1:0)
Zestawa domjacych: Hahn – Hrjehor, Reineke, Kral, Matješk, Pawlik, Hanuza, F. Domš, O. Domš, Kral, Ričel (79. Schaaf)
zestawa hosći: Haupt – Tietze, Volz, Swakon, Krygar, Benad, Becker (75. Günter), Schmidt, Schwurack, Bolz, Hennersdorf
W poslednjej mjeńšinje dobyli
ST 1922 Radwor – ST Hlinowc 2:1 (1:1)
Zestawa hosći: Tausend – Reinecke, Šěrak, Grubert, Paška (10. Jendrewski), Nuk, Wjeńka, Schöne, Pječak, Wróbl, Schulze
Při rjanym wjedrje je na domjacu dypkowu hru prěnjeho koparskeho mustwa ST 1922 Radwor wjac hač sto ludźi přišło. Dokelž swjećeše Sportowe towarstwo z Hlinowca tón kónc tydźenja 90lětne wobstaće, organizowachu zamołwići bus, kotryž bě fanow do Radworja přiwjezł. Něhdźe 40 přiwisnikow hosći postara so z bubonom a banerami wo dobru atmosferu. Přiwšěm stachu so tež njerjane momenty, jako zapalichu pyrotechniku. Sudnik dyrbješe hru na pjeć mjeńšin přetorhnyć.
Pančičanscy koparjodale bjez dypka
ST Marijina hwězda – Biskopičanske KT 08 II 1:3 (0:1)
Zestawa domjacych: O. Schmidt – Wróbl (46. Lipič), Zelnak, Ch. Cyž, R. Cyž, Pjetaš, Hawš, Pa. Lugge (57. Fischer), P. Schmidt (57. Pi. Lugge), Eldor (62. Jurš), Pakoßnick
Wojowali a přiwšěm přěhrali
SJ Chrósćicy – FSV Wódrjeńca 0:1 (0:0)
Zestawa domjacych: Králíček – L. Zahrodnik, M. Zahrodnik, Sentivan, F. Zahrodnik, Zynda (77. Mark), Wornar (66. Krawc), Runt, G. Zahrodnik, Matješka, Bogusz
Škit při wolejbulnišću připrawjeny
Z podpěru Salowskeho energijoweho zastaraćela EVSE su škit wokoło bičwolejbulnišća w Róžeńće njedawno ponowili. Tak je betonowa kroma nětko zaso porjadnje škitana. Nimo toho njemóža zliwki pěsk hižo z hrajnišća wotpławić. Wo připrawjenje wulkich plastowych rołow, kotrež su wěsće mjez sobu zwjazane, staraše so sobudźěłaćer EVSE Andreas Ričel z Njebjelčic, wo kompletne financowanje we wobjimje něhdźe 1 000 eurow firma EVSE.
Prěni wjetši turněr na Róžeńčanskim ponowjenym bičwolejbulnišću mějachu hižo spočatk awgusta, jako bě tam bičtura Radija Satkula pozastała. Ale tež wjesne dźěći Linus Hrjehor, Kajus Debik, Johan Šnajder a Silas Hrjehor (wotlěwa) hrajnišćo rady wužiwaja.
Wjesne towarstwo Róžant kaž tež gmejna Ralbicy-Róžant, kotraž je towaršnik EVSE, dźakujetej so wšitkim akteram za podpěru, wosebje pak jednaćelce Salowskeho energijoweho předewzaća, knjeni Sylwiji Schenker, kotraž je ponowjenje na njekomplikowane a spěšne wašnje zmóžniła. Konstantin Hrjehor
Treningowe lěhwo wolejbulistkow Viktorije Worklecy zazběh było
W awgusće přewjedźechu wolejbulistki Viktorije Worklecy třidnjowske treningowe lěhwo w domjacej sportowej hali. Tak zahajichu Worklečanki aktiwny přihot na hrajnu dobu 2021/2022 we wobwodnej lize wuchodneje Sakskeje.
Zazběh tworješe prěnja treningowa jednotka pjatk wječor we Worklečanskej ćěłozwučowarni. Hłowne ćežišćo běchu wšelakore hrajne formy. Zakónčaca hra treningowy zazběh skulojći. Za sobotu běchu hnydom tři jednotki planowane. Dopołdnja trenowachu wolejbulistki hornje přihraće. Mjez druhim pospytachu so w přihrawkach přez hłowu, štož bě za přistajerki wažne zwučowanje. Prěni blok wotzamknychu z hru. Po něhdźe hodźinskej přestawce slědowaše druha jednotka, hdźež tworješe delnje přihraće – technika, znata jako bager – fokus. Tež tam přewjedźechu wšelakore zwučowanja. Tež druhi blok z hru wotzamknychu.
Do přichodneho koła so dračowali
HZ Budissa Budyšink/Malešecy II – ST 1922 Radwor 0:2 (0:1)
Zestawa hosći: Ch. Šěrak – Reineke, Wjacławk (70. Krječmar), F. Šěrak, Wróbl, Schöne (46. H. Hetaš), Wjeńka, Jendrewski, Paška, Grubert, Pječak (86. Glücklich)
Po tym zo běchu koparjo Radworskeho ST prěnju dypkowu hru we wokrjesnej lize 4:2 dobyli, dyrbjachu woni w prěnim wokrjesnym pokalnym kole do Budyšinka. Přećiwnik, kiž hraje we wokrjesnej klasy, bě underdog. Zaměr Radworčanow tuž bě pokalnu partiju jasnje za sebje rozsudźić.
