W zymje volleyball hrać? Haj, to je w kóždej sportowni móžno. A što je z beachvolleyballom? Ně, je dźě přezyma, a často mjerznje! Mam pak něšto noweho za was: snowvolleyball. Mysliće-li runje na krótke cholowy, pěsk a wysoke temperatury, móžeće to hnydom zabyć. Tu su volleyballisća ćopłu sportowu drastu woblečeni a hraja w sněze. Nimo toho maja koparske črije wobute.
Snowvolleyball je wosebita warianta volleyballa, při kotrejž je hrajnišćo w sněze. Regularije wotpowěduja tym beachvolleyballa. Snowvolleyballowa hra pak wotměwa so na wysokosći něhdźe 2 000 metrow. Snowvolleyball njeje žana wunamakanka z Němskeje. Wuwili běchu tule sportowu družinu w lěće 2009 w awstriskim Wagrainu. Po wjacorych turněrach w Alpach připózna awstriski volleyballowy zwjazk 7. nowembra 2011 snowvolleyball jako oficialnu sportowu družinu. Před lětomaj bě tak daloko, zo je ju Europske volleyballowe zjednoćenstwo (CEV) oficialnje do programa přiwzało. Wotnětka buchu turněry pod hesłom Snow Volleyball European Tour přewjedźene.
Hodownu husycu sej wotběhać
Natwar Němske Pazlicy chce druhi hodowny swjaty dźeń znowa sportowy podawk bjez wubědźowanskeho charaktera přewjesć. 17. raz móža sej tam zajimcy hodownu husycu wotběhać. Loni bě so 260 sportowcow wobdźěliło. Pjećkilometerska čara wokoło wulkeho hata je za kóždeho zmištrujomna. Tež psy, dźěćace wozyčki a kolesa smědźa ludźo sobu na puć wzać. Start je w 10 hodź.
SZ-cup a Landskron-cup
27. decembra budźe w sportowej hali na Budyskim Třělnišću tradicionalny halowy koparski turněr wo pokal dźenika Sächsische Zeitung. Jeho mjeztym 22. cup započnje so w 17 hodź. W stafli A hraja Budissa Budyšin U 21, ST Horni kraj Sprjewja, ST Budyšin a Motor Kumwałd; w stafli B FSV Nowosólc-Hródk, ST Hnašecy-Dobruša, ST Wjelećin a Póst Germanija Budyšin. Landskron-cup přewjedu w Budyšinje potom 6. januara wot 14 hodź., tež w sportowni na Třělnišću. Tam hraja w skupinje A Budissa Budyšin, Jednota Kamjenc a Přezjednota Niska; w stafli B FC Hornja Łužica Neugersdorf, Biskopičanske KT a dobyćer SZ-cupa.
Na basketball do „Slavije“
Mixvolleyballisća Budyskeje FSG zahajichu 28. mišterstwa na hobbyjowej runinje ze štyrjomi dobyćemi. Aktualnje steja woni mjez sydom cyłkami na druhim městnje.
Spočatk nowembra zahaji so w Budyskim wokrjesu mjeztym 28. sezona w mixvolleyballu. Bjez amtěrowaceho mištra SZ Chróstawa zapřimny sydom cyłkow do boja při wysokim saku. Budyska FSG je hižo 24 lět pódla a wostanje z jědnaće wokrjesnymi titulemi dale najwuspěšniše měšane mustwo Budyskeho wokrjesa. Dypkowe hry 2017/2018 zahajichu FSGnicy ze štyrjomi dobyćemi. Zwjesela, zo je po dlěšim času wustrowjenja hłowny nadběhowar John Petrik zaso k dispoziciji. Serbska sobuhrajerka Michaela Mošowa pak cyłkownu sezonu wupadnje, dokelž su bolosće w prawym ramjenju přewulke.
Mixvolleyballisća 11. lětnika Serbskeho gymnazija Budyšin (SGB) skónčichu lěto z docpěćom finala abi-cupa 2017 a z dobyćom adwentneho turněra na serbskim kubłanišću.
Najrjeńše hodowne dary su te samopaslene. Tajki su Worklečanscy volleyballisća sebi a swojemu přiwiskej wobradźili. Minjenu sobotu steješe mjenujcy kónčne koło wo wobwodny pokal wuchodneje Sakskeje na dohodownym programje. Dwě lěće do toho běchu sej sportowcy Viktorije pokal hižo raz zawěsćili a loni w krajnym pokalnym kole startowali. Lětsa pak nadawk runjewon lochki njebě, dokelž dyrbjachu so Worklečenjo w finalnych hrach přećiwo TSV Kundraćicam, OSC Lubijej a Módro-běłym Wojerecy přesadźić – přećiwo kontrahentam, kotřiž steja w tabulce wobwodneje ligi wšitcy před Viktoriju. Nimo toho mějachu jeno šěsć hrajerjow k dispoziciji, dokelž běchu dalši zranjeni abo powołansce zadźěwani. Rjenje, zo je sej Alexander Kral z volleyballoweje rezerwy trikot woblekł, zo by w nuzy wupomhał.
Módro-běli Wojerecy II – OSC Lubij 2:1 (25:20, 21:25, 15:10)
Hrajny dźeń bě so z partiju OSC Lubij přećiwo Módro-běłym Wojerecy II započał. Při tym nasta napjata partija, kotruž volleyballowi přećeljo z Wojerec 2:1 (25:20, 21:25, 15:10) dobychu.
Viktoria Worklecy 92 – TSV Kundraćicy 2:1 (23:25, 25:13, 15:11)
Z Němcow pochadźaca 44lětna Serbowka Beata Čórlichec je třeći króć na najćešim Ironman-wubědźowanju swěta na kupje Hawaii startowała, a je wurisanje zaso z brawuru zmištrowała. Porno lońšemu je so samo wo nimale pjeć mjeńšin polěpšiła. Jeje cyłkowny čas běše 10:43 h (3,8 km płuwanje w 1:17 h, 180 km kolesowanje w 5:31 h a 42,2 km marathonowy běh w 3:48 h). Mjez 2 365 starterami – profijemi kaž amaterami – wobsadźi wona cyłkowne 813. městno. W swojej starobnej klasy 40-44 lět doběža na wurjadnym 13. městnje, a w njej běše samo najlěpša Němka. Mjez 672 žónskimi wobsadźi jara dobre 96. městno. Po wubědźowanju wosta Beata Čórlichec, kaž hižo loni, hišće tydźenjej na Hawaiiju a je tam zaso dźěl swojeho dowola přežiwiła. Za Serbske Nowiny je so Jurij Nuk z rodźenej Němčanku rozmołwjał.
Kak sy so na lětuše wurisanje přihotowała?