Štyri króć štyri dypki – kuriozna zestawa na njedobro Ukrainy
Rumunska je njewočakowano w skupinje E dobyła. W poslednjej skupinskej hrě přećiwo Słowakskej docpě Rumunska 1:1. Paralelna hra w Stuttgarće mjez Belgiskej a Ukrainu njeměješe tohorunja žanoho dobyćerja, wona skónči so 0:0. Wšitke mustwa mějachu w tabulce na kóncu štyri dypki. Rozsudna běše diferenca wrotow: Belgiska wosta druha před Słowakskej, wobaj cyłkaj stejitej tak wěsće we wosmifinalu, mjeztym zo Ukraina zwrěšći.
Němska ma wšitke šansy na titul
Europske mišterstwo w kopańcy, wosebje pak wukony němskeho mustwa, tuchwilu wulki zajim zbudźa. Fanojo woblubowaneho sporta čakaja na přichodnu hru tule sobotu.
Worklecy/Njebjelčicy (mj/SN). Hižo nětko lubowarjo kopańcy wo tym diskutuja, hač ma němske mustwo šansu, titul europskeho mišterstwa dobyć. „Jeli wšitcy, trenar, sportowcy a přewodnicy z tuteje hry wuknu, potom přicpěwam němskemu mustwu titul europskeho mištra. Za to trjebaja podpěru fanow w stadionje“, rjekny Franc Richter. A Tadej Cyž měni: „Jeli w štwórćfinalu Němcy přećiwo Španiskej dobudu, sym sej wěsty, zo europske mišterstwo dobudźemy.“ Koparskaj fachowcaj znajetaj kwalitu mustwa.
Po dobyću na trawniku poražka za zelenym blidom
Nachwatanska hra w Kumwałdźe mjez tamnišemu koparskemu cyłkej a Chróšćanskej rezerwu wotmě so pjatk do Swjatkow. Chróšćenjo tehdomnišu hru suwerenje 6:1 dobychu. Za hosći bě Alwin Graf trójce trjechił, dwójce bě Křesćan Zahrodnik wuspěšny a wo kónčny staw postara so Bosćan Donat.
Něšto dnjow po hrě pak Chróšćenjo zhonichu, zo so staflowy nawoda wokrjesneje ligi z hru zaběra. Zakład skóržby bě zestawa hosći. Tak smě druhe zastupnistwo jednoho towarstwa po regularijach Sakskeho koparskeho zwjazka (SFV) jenož dwaj stajnaj hrajerjej prěnjeho mustwa w swójskej winowatostnej hrě zasadźić. Dale je tam postajene, zo su stajni hrajerjo ći, kotřiž su w 50 procentach wšěch winowatostnych hrow aktualneje sezony na trawniku stali. Při tym njerozeznawaja mjez hrajerjemi startoweje zestawy a pozdźišo zaměnjenymi.
Chróšćanam tute prawidło po zdaću wědome njebě, wšako podpěrachu w tutej hrě hnydom šěsć stajnych hrajerjow prěnjeho mustwa druhe zastupnistwo, mjez druhim sylny hrajer Alwin Graf.
Wuslědki (27.06.24)
Wokrjesna liga stafla I
1. Arnsdorfske KT 26 87 : 35 58
2. Bretnig-Hauswalde 26 93 : 51 58
3. ST Porchow 26 71 : 41 55
4. ST Marijina hwězda 26 72 : 39 50
5. TSV Wjazońca 26 69 : 41 45
6. Motor Kumwałd 26 73 : 63 37
7. SZ Steinigtwolmsdorf 26 68 : 60 37
8. HZ Huska/Hodźij 26 57 : 56 35
9. TSV Wjernarjecy 26 56 : 72 32
10.ST Wjelećin 26 52 : 66 31
11. HZ Frankenthal 26 46 : 71 30
12.SJ Chrósćicy II 26 39 : 67 24
13. HZ Rakecy/Minakał II 26 38 : 103 20
14. SZ Drjewnica 26 25 : 81 10
Wokrjesna liga stafla II
1. Zeleno-běli Bukecy 26 81 : 39 54
2. LSV Hory 26 92 : 63 49
3. ST Kubšicy 26 73 : 40 48
4. Módro-běli Minakał 26 61 : 33 48
5. Traktor Malešecy 26 61 : 37 41
6. ST Wulka Dubrawa 26 48 : 31 41
7. FSV Łuty 26 51 : 41 40
8. HZ Nadrózna Hrabowka 26 65 : 58 38
9. ST Lubuš 26 58 : 56 37
10. Wojerowski FC II 26 59 : 61 37
11. ST Kinspork/Łužnica 26 46 : 60 31
12. ST Bart 26 30 : 63 28
13. Nat. Němske Pazlicy II 26 26 : 98 11
14. Wóslink/Skask./Kul. II 26 20 : 91 10
Nic Francoska, nic Nižozemska, ale Awstriska
Z tym njeby do koparskich europskich mišterstwow drje nichtó ličił. Dobyćer skupiny D rěka Awstriska. Z wuspěchom 3:2 přećiwo Nižozemskej zaćehnje wubranka trenarja Ralfa Rangnicka jako skupinski dobyćer do koła poslednich 16 mustwow, hišće před wysoko posudźowanymi Francozami z Kylianom Mbappéjom.
Awstriska postajowaše najprjedy partiju. Prócowanja mytowaše njedobrowólnje Donyell Malen, kiž suny so do flanki a bul do swójskich wrotow stłóči (6. min.). Po přestawce dźěše tam a sem. Najprjedy wuruna Cody Gakpo z wobhladanjahódnej třělwu do praweho róžka (47.), potom docpě Romano Schmid znowa nawjedowanje z hłowu (59.). Memphis Depay postara so artistisce wo 2:2 (75.). Marcel Sabitzer rozsudźi z třělwu we 80. min. napjatu hru w Berlinskim olympiskim stadionje za Awstrisku. Tak trjechi awstriska wubranka wutoru we wosmifinalu na druheho skupiny F. Nižozemjenjo su jako jedyn ze štyrjoch najlěpšich skupinskich třećich tohorunja za přichodne koło kwalifikowani. Přichodny přećiwnik hišće jasny njeje.
Kónc tydźenja połny rozbudźacych wokomikow w Pančicach
Skónčnje bě tak daloko, 14. a 15. junija w Pančicach swjećachu, a to 100+ lět ST Marijineje hwězdy z.t.
Z kóždolětnym koparskim turněrom Serbskeho Sokoła z.t. započa so pjatkowny wječor. Na kóncu smědźeše hosćićel z 1. městnom wuběrnje do swjedźenskeho kónca tydźenja startować. Po wuspěšnym turněrje slědowaše zhromadny wječor z public viewingom w swjedźenskim stanje. Mnozy su přeprošenje sćěhowali, prěnju domjacu hru němskeje koparskeje wubranki při europskich mišterstwach hladać. Stan bě derje pjelnjeny, nic jenož z čłonami towarstwa, ale tež z hosćimi a wćipnymi. Krónowace zakónčenje bě na tutym wječoru, zo je němske mustwo dobyło. To su wězo tež hišće swjećili.
Kopańca ze swojimi rjanymi stawiznami přihladowarjow wobkuzłała
Hdy by kumštna inteligenca nadawk měła, wurjadnu koparsku scenu zestajić, kotraž je něhdźe 31 sekundow dołha, dwě paradźe wrotarja ze swětowej klasu wobsahuje a k tomu dyrbi hišće zrudobu a njesměrne wjeselo jednoho hrajerja a cyłeho kraja pokazać, potom by wuslědk wrotam Luki Modrića, w hrě Chorwatskeje přećiwo Italskej, jara podobny był. Kak njezapomnita tuta scena tež běše, wosmifinale za Chorwatsku nimale wjace móžne njeje. Italska je z wrotami w poslednjej mjeńšinje wosmifinale koparskich mišterstwow docpěła.
Wuchadźišćo do hry wupadaše za Italsku lěpje. Chorwaća trjebachu dobyće, zo móhli hišće druhe městno docpěć. Tomu wotpowědujo započa Chorwatska aktiwnišo a z jasnje wjace wobsydstwom bula. Italska dźeržeše so wróćo a łakaše na zmylki Chorwatow. Potom pak so wobraz zwjertny, Italska přińdźe přeco lěpje do hry a wubranka wokoło Modrića namaka na tamnej stronje lědma raz puć přez italsku defensiwu do šěsnatki.
Na sezonu wróćo zhladować
Za koparjow a zamołwitych prěnjeho koparskeho mustwa ST Marijineje hwězdy bě w minjenej hrajnej dobje změna porno lońšej, wšako měješe Zapadołužiski koparski zwjazk nowe rozdźělenje staflow. Tohodla dyrbjachu Pančičenjo nětko w stafli 1 nastupić. To njebě za chowancow trenarskeje dwójki Franka Schneidera/Kaija Frenzela jenož dospołnje nowy teren, ale zdobom z dlěšimi wonkownymi jězbami zwjazane. Wšako pochadźeja mnozy kontrahenća z Hornjeho kraja. Cil do starta dypkowych hrow rěkaše so mjez najlěpšimi pjeć teamami etablěrować. Štož poradźi so w kónčnym wotličenju samo ze štwórtym městnom.
Dypki: Po 26 hrajnych dnjach měješe Marijina hwězda 15 dobyćow, pjeć remisow, a bohužel pak tež šěsć poražkow na swojim konće, štož wunjese po wrotowym poměrje 72:39 naposledk 50 dypkow. To woznamjenješe samo ličak wjace hač w minjenej sezonje. Ze 26 dypkami do zymskeje přestawki a ze 24 ličakami po zymskej přestawce wuhrachu sej štwórte městno w kónčnym tablowje.
KnappenMan ma so etablěrować
Wot nowembra 2022 steji towarstwo KnappenMan z.t. oficialnje w registrje Hamtskeho sudnistwa Drježdźany. Žanej dwě lěće pozdźišo přewjedźe wone z trójku Jan Frobart, Thomas Leberecht, Harald Skopi a 200 pomocnikami prěnje wulkozarjadowanje z triatlonowymi mišterstwami Němskeje při Třižonjanskim jězoru pola Łaza. Jan Hrjehor je so z Janom Frobartom zetkał.
Triatlonowe wubědźowanje KnappenMan budźe lětsa cyle wosebite, dokelž ...
J. Frobart: ... směmy triatlonowe mišterstwa Němskeje na dołhej distancy přewjesć, a dokelž sčinimy ze sportoweho zarjadowanja wulki ewent.
Tele triatlonowe mišterstwa na dołhej distancy přińdu do Łužicy, dokelž ...
J. Frobart: ... chcemy pokazać, zo móžemy tu we Łužicy němske mišterstwa wuspěšnje přewjesć, zo móžemy z našimi sportowcami a pomocnikami wulkotne zarjadowanje na nohi stajić.
Jako sportowc, triatlet, płuwar, kolesowar abo běhar dyrbjała abo dyrbjał so za jedne z wubědźowanjow KnappenMan, pak za staflowe wurisanja abo tež za wubědźowanja jednotliwcow přizjewić, dokelž ...
Bjez podpěry njeńdźe
– trjebamy Tebje a Was!
Planowanja za posledni kónc tydźenja w awgusće 2024 dale pokročuja! KnappenMan z.t. trjeba za přewjedźenje 36. nakłada spěšneho triatlona we Łužiskej jězorinje něhdźe 200 dobrowólnych pomocnikow, a to na kóždym z dweju wubědźowanskeju dnjow. Bjez pomocnikow, čarowych stražnikow a sobuskutkowacych njehodźi so tajki wulki sportowy event zwoprawdźić. 24. a 25. awgusta, ale tež na dnjach do toho je kóžda pomocliwa ruka trěbna.
Jeli maš wjeselo nad triatlonom, njech jako sportowc abo horliwy wobydler a přihladowar, jako towarstwo abo dobrowólna wohnjowa wobora, chceš k tomu přinošować, zo stanje so triatlonowe wubědźowanje we Łužicy z wulkotnym wuspěchom, potom so prošu přizjew. Přizjewjenski formular steji na webstronje www.knappenman.com. Wupjelnjeny a podpisany formular pósćel na
Wjeselimy so na Tebje!
Jan Hrjehor
