Za Sokoł zasadźeni běchu: Mjetaš-Wowčer – Brězan, Statnik, Brückner, Rychtar, Šwejda, Čornak, J. Šołta, Jakubaš, Krawc, Žur, Hrjehor, Wałda, R. Šołta
Prěni raz wobdźělichu so Ralbičanscy stari knježa-koparjo na sakskich krajnych mišterstwach w starobnej klasy Ü 35 w Lipsku. Jako lońši wokrjesny mišter wólnočasneje koparskeje ligi mějachu woni prawo so za turněr přizjewić. Runočasnje přewjedźechu w Lipsku tež turněr za starobnu klasu Ü 50 na małym hrajnišću. A na nim wobdźěli so Hrajne zjednoćenstwo Módro-běli Kulow/Sokoł Ralbicy/HFC Natwar Wojerecy. Tak podachu so Ralbičenjo z Kulowčanami zhromadnje z wulkim busom do Lipska.
Za turněr Ü 35 bě šěsć cyłkow přizjewjenych. Techniski wuběrk pak zdźěli, zo su tři mustwa z najwšelakorich přičin krótkodobnje wotprajili. Z Lipšćanskeje kónčiny wobdźěli so SSV Stötteritz, z Drježdźan RT 06 Laubegast. Modus bu tuž změnjeny, a kóždy nastupi dwójce přećiwo kóždemu, a to stajnje 20 mjeńšin.