Gaza (dpa/SN). Do wočakowaneje wojerskeje ofensiwy je israelska armeja započała, město Rafah na juhu Gazaskeho pasma ewakuować. Wójsko je palestinskich wobydlerjow namołwjało, so do někotre kilometry zdaleneho lěhwa Al-Mawasi podać. Potrjechenych je něhdźe 100 000 ludźi. W lěhwje su „humanitarne pasmo“ zarjadowali. Tam maja ludźo žiwidła, wodu a lěki. Armeja je tam pječa pólne chorownje natwariła.

Wčera bě islamistiska Hamas při raketowym nadpadźe na pomjezny přechod Gazaskeho pasma třoch israelskich wojakow moriła. Jědnaće wojakow so zrani. Nadpad bě israelskemu wójsku nastork, ofensiwu zahajić. Zwjazkowa wonkowna ministerka Annalena Baerbock (Zeleni) je nadpad na israelskich wojakow raznje zasudźiła. Šef ameriskeje tajneje słužby CIA Wiliam Burns chcyše so dźensa z israelskim ministerskim prezidentom Benjaminom Netanjahuom zetkać. Při tym chcyše so za přiměr k pušćenju zastajencow zasadźować. Mjeztym je Hamas jednanja z Israelom wo tym přetorhnyła.

Tři dny trajacy zjězd CDU w Berlinje zahajeny – debata wo wusměrjenju

Berlin (dpa/SN). Z narěču stronskeho předsydy Friedricha Merza je CDU dźensa w Berlinje tři dny trajacy zjězd zahajiła. W srjedźišću prěnjeho dnja zetkanja delegatow stejachu w popołdnišich hodźinach wólby 68lětneho Merza za noweho předsydu. Merz je zdobom předsyda frakcije CDU/CSU w zwjazkowym sejmje. Na zjězdźe pod hesłom „Přichod sej zhromadnje zdobyć“ chcedźa so křesćanscy demokraća pjeć tydźenjow do wólbow Europskeho parlamenta jako přećiwny model amploweje koalicije SPD, Zelenych a FDP prezentować.

W swojej narěči šwikaše Friedrich Merz politiku tuchwilneho knježerstwa jako zwrěšćenu. Runočasnje bě sej wón wěsty, zo je CDU po hórkej wólbnej poražce lěta 2021 a po zestupje strony do opozicije zaso derje nastajena. „CDU dźe doprědka, CDU je zaso tu“, rjekny wón k zahajenju zjězda. Tón ma po jeho słowach „sylny signal rozmacha“ dawać.

Zo wěnujemy sławnej wosobje, kotraž ma jubilejny dźeń wosebity swjedźeń – to njewšědne njeje. Zo pak wěnuja lětsa wšelacy iniciatorojo dwójce dwutydźenski wjeršk historiskej/mystiskej wosobje Jankej Šajatovićej/Krabatej, mam za Wojerecy a wokolinu za jara wobohaćace. Wosebje mje wjeseli, zo je na připowědźenym poskitku we Łužiskim centeru wulka ličba serbskich akterow zastupjena. Zawěsće njejsu ani hišće wšitke znate, myslu-li na flashmob a na přeprošenje ZARI na wšitkich, kotřiž chcedźa swój talent zjawnje pokazać. Z tym so Serbja jako načasny lud a nic jeničce jako swojim tradicijam zwjazani prezentuja – z idejemi, kotrež do přichoda wjedu. Jedna wěc pak mje přiwšěm zaběra: Zo Łužiski center dotal za zarjadowanje zjawnje wabił njeje. Tuž dźakuju so Lucijanej Kaulfürstej, rěčnemu motiwatorej projekta ZARI, kotryž je na zašłym zarjadowanju „Happy Monday“ w Budyšinje na flashmob a z tym na Dny Šajatovića skedźbnił. Milenka Rječcyna

Rój pčołkow w koparskim stadionje popadnyła je wohnjowa wobora minjenu sobotu w Stuttgarće, dwě hodźinje do zahajenja koparskeje hry přećiwo Bayeram. Insekty běchu so na sćežorje wótřerěčakow zasydlili. We wobchadźenju z pčołkami kubłany wohnjowy wobornik je pčołki w pčołkacym košu popadnył a w lěsu zwonka města wusadźił. Kak bychu pčołki na haru w stadionje a na syły ludźi reagowali, njeje jasne.

Pytajo za rjanymi fotami z přirody je so 81lětny na sewjeru Mecklenburgsko-Předpomorskeje w bahnje zabłudźił a tam tčacy wostał. Z pomocu helikoptera jeho skónčnje wućahnychu. Starc bě předwčerawšim, sobotu, za přećelomaj přirody w bahnje po puću, a bě naraz zhubjeny. Jako jeho nańdźechu, tčeše wón hač k pasej w bahnje. Pomocnicy so k njemu předrěchu a helikopter přiwołachu.