Lědma je so nowe lěto započało, da dźěše za młodych sportowcow Budyskeho lochkoatletiskeho towarstwa OSLV hižo wo medalje a nowe wosobinske rekordy. Drježdźanske towarstwo DSC bě minjenu sobotu na regionalne halowe mišterstwa starobnych klasow U 12 do U 16 přeprosyło. Tež šulerjo Serbskeho šulskeho a zetkawanskeho centruma (SŠZC) Budyšin běchu sej tón abo tamny dobry wuslědk wuličili. Najmłódši při tym bě zdobom najwuspěšniši – Elias Kummer (M 10) ze serbskeje zakładneje šule wudoby sej w kóždej ze štyrjoch disciplinow, w kotrychž bě nastupił, medalju. Złota błyšćeše so po běhu 60 m přez płótki, hdźež so wón w sylnych 11,24 sek. jasnje wot wšitkich konkurentow wotsadźi. W dalokoskoku (3,74 m) a wysokoskoku (1,00 m) wubědźi sej slěbornej medali a wudospołni sadźbu z bronzu w sprinće 50 m (8,04 sek.).
W Rychbachu pola Lubija wotmě so volleyballowe regionalne finale pod hesłom „Młodźina trenuje za olympiju“. Mjez wobdźělnikami štyrjoch najlěpšich šulow wuchodneje Sakskeje dobychu hólcy Serbskeho gymnazija Budyšin (SGB) wšitke partije z 2:0 a pojědu na krajne finale do Dippoldiswaldy. Holcy w finalu bohužel podležachu a zakónčichu turněr ze slěbrom.
Serbski gymnazij Budyšin – Humboldtowy gymnazij Radeberg 2:0
Hnydom w prěnjej sadźbje čakaše na hólcow wokoło kapitana Mateja Cyža najsylniši kontrahent turněra. Technisce jara dobri, ale ćělnje mjeńši hrajerjo z Radeberga dypkowachu wosebje přez swojeho hłowneho nadběhowarja. Homogeny cyłk SGB pak zmištrowa zazběhowu sadźbu z 25:20. Taktiske změny w blokowanju a serije sylnych nadaćow dopomhachu w druhim přechodźe k jasnemu 25:12.
Serbski gymnazij Budyšin – Friedricha Schleiermacherowy gymnazij Niska 2:0
FSV Budissa Budyšin
– NVF Žołto-běli Zhorjelc 9:1 (5:0)
Za domjacych zasadźeni: J. Jakubov, Große – Patka, Klippel, Heineccius, Walther, Reher, Hausdorf, Heppner, Hansch, Kral, Hoßmang, Fröhlich, Čermák, A. Jakubov, Rosendo, Pfanne, Kolan.
Po přesłapjacym předstajenju minjeny pjatk wječor w hali su so koparjo Budissy Budyšin sobotu na kumštnym trawniku w Humboldtowym haju zaso wo jasne poměry starali. Krajny ligist NFV Žołto-běli Zhorjelc jako testowy přećiwnik dyrbješe so wot wšeho započatka přećiwo pjatkownemu mjerzanju a hněwej hrajerjow Budissy wobarać. Hósć njeměješe wot prěnjeje minuty žanu šansu a běhaše zwjetša za bulom a přećiwnikom. Wo třělwy w połojcy hosćićela, starachu so bjez problemow škitarjo a wrotar Jakub Jakubov. Florianej Hanschej poradźi so wobhladanjahódna hra. Wón třěli štwore z dohromady dźewjeć wrotow za Budissu. W prěnim połčasu dyrbješe Zhorjelski wrotar hnydom pjeć razow zady so přimnyć. Za domjacych trjechichu Florian Hansch, Paul-Max Walther, Chris Reher, Hansch a hišće raz Hansch.
Budissa Budyšin, hosćićelka haloweho turněra wo pokal piwarnje Landskron, bě sej tež lětsa zaso pjeć koparskich cyłkow z Hornjeje Łužicy na mocyměrjenje přeprosyła. Zakitowar pokala bě FC Hornja Łužica Neugersdorf. Nimo regionalneho ligista startowachu wyši ligist Biskopicy, krajnej ligistaj Jednota Kamjenc a Žołto-běli Zhorjelc a dobyćer SZ-cupa Budestecy/Korzym.
Kóždy hraješe přećiwo kóždemu, a to stajnje 12 mjeńšin. Budyšenjo runjewon optimalny start njemějachu a njemóžachu tež pozdźišo, w běhu turněra, přeswědčić. W předkole so koparjo Jednoty suwerenje přesadźichu a zaměstnichu so samo před FC Hornjej Łužicu Neugersdorf. Budyšenjo přesłapichu a wobsadźichu po předkole jeno štwórte městno, tak tež na kóncu. Clemens Werner
1. połfinale
Jednota Kamjenc – Budissa Budyšin 3:0
2. połfinale
HŁ Neugersdorf – Biskopičanske KT 08 5:4
hra wo městnje 5 a 6
Žoł.-běli Zhorjelc – Budestecy/Korzym 1:0 hra wo městnje 3 a 4 Budissa Budyšin – Biskopičanske KT 08 6:7
finale
Jednota Kamjenc – HŁ Neugersdorf 2:3
zaměstnjenje
1. HŁ Neugersdorf
2. Jednota Kamjenc
3. Biskopičanske KT 08
FK Ústí nad Labem
– Serbska wubranka 7:0 (3:0)
Za wubranku hrajachu: Chrystof Gloxyn – Pětr Domaška, Bosćij Bjeńš, Fabian Korjeńk, Antonius Wałda, Křesćan Bejmak, Bosćij Bejma a Tomaš Bejma (wšitcy Sokoł Ralbicy/Hórki), Tomaš Domaška, Michał Młynk (wobaj SJ Chrósćicy), Feliks Hrjehor, Patrik Woko (wobaj Jednota Kamjenc) Robert Lejnart, Jurij Haška (wobaj SJ Njebjelčicy), Stefan Göbel (Korjeńske ST, Delnja Łužica), Denny Gloxyn (Budissa Budyšin), Dawid Jurš (ST Marijina hwězda). Paul Zimmermann (Budissa Budyšin) njebě zranjenja dla zasadźeny.
ST Kupoj/Nowa Łuka
– Viktoria Worklecy 2:3
(25:22, 25:23, 22:25, 23:25, 13:15)
Druha połserija bě so za muži-volleyballistow Viktorije Worklecy ze šlagrowej hru započała. Přećiwnik bě načolnik ST Kupoj/Nowa Łuka. Z dobyćom bychu nadźije na mišterstwo we wobwodnej lize zaso wutk dóstali. Nowe lěto běchu sej Worklečanscy hólcy po intensiwnym treningu a nadrobnych rozmołwach předewzali, zo chcedźa so z dypkami z wonkowneje partije nawróćić. Hnydom wot prěnjeho nadaća bě hra wurunana. Wšitcy w hali widźachu, zo stejitej na parkeće najlěpšej teamaj ligi. Wo kóždy bul so horco wojowaše. Na kóncu prěnjeje sadźby móžachu hosćo zastatk hišće skrótšić, přiwšěm ju z 22:25 přěhrachu. Njerezignowachu pak, ale wojowachu dale. Wosebje přiwzaće bulow a pólne wotwobaranje nětko wo wjele lěpje fungowaštej. Při stawje 22:21 bě wukónc dospołnje wotewrjeny. Zo měješe přećiwnik nós z dwěmaj dypkomaj prědku, bě škoda, ale žana drama.
W Žitawje nastupić bě zwjazene z winowatosću, sej přećiwo poslednjemu tabulki tři dypki zawěsćić. Tróšku zmužite to bě, wšako dźěchu volleyballistki ST Marijineje hwězdy z minimalnym kadrom do hry. Jeničku hrajerku měješe trenar Ralf Wachsmann za wuměnjenje k dispoziciji. A runje ta wopokaza so jako joker.
VV Žitawa 09 II – ST Marijina hwězda 1:3 (20:25, 25:27, 25:18, 20:25)
Prěnja sadźba wotpowědowaše wšitkim wočakowanjam. Marijine hwězdźički přewzachu wot spočatka nawjedowanje, wotsalichu so na 10:3 a přinjesechu předskok ze solidnej hru do cila. Tak chcychu tež w přichodnym přechodźe dale hrać. Natwarichu přez seriju nadaćow Susi Glücklichoweje spěšny předskok. Tola zaso raz znjezmóžnichu problemy při přijimanju bula dobry nadběh natwarić. Na zbožo woraše přećiwnik runje telko zmylkow. Tak wuchowachu Pančičanki nawjedowanje hač krótko do kónca. Tola při stawje 24:21 přinjese jich Žitawa z wulkim bojom do wuskosćow. Wuruna a měješe ze 24:25 sadźbowy dypk. Tón hosćo na zbožo wotwobarachu a skónčichu sadźbu ze 27:25.
20 cyłkow je so pola Serbskeho Sokoła, třěšneho zwjazka, serbskich sportowčow a sportowcow, za 34. sokołski volleyballowy turněr dnja 12. měrca přizjewiło. Skupiny wulosować chcedźe srjedu, 13. januara, w 10 hodź. w Serbskim šulskim a zetkawanskim centrumje Budyšin. Tule mjena přizjewjenych mustwow:
1. Mustwo 1296
2. Marijina hwězda Pančicy
3. Róžant
4. Sokoł Budyšin
5. Serbski dom Budyšin
6. Skupina brodatych
7. ST 1922 Radwor
8. SGB – wučerjo
9. Rapaki
10. Dom biskopa Bena
11. Přećeljo z pólskeje Tokarnje
12. SJ Chrósćicy
13. Něhdyše dwanatki
14. Škit Budyšin
15. SGB – 12. lětnik
16. SGB – 11. lětnik
17. Eskimowcy
18. Ryćerjo
19. Zapalaki
20. Kamehameha
Awtor dźensa
Clemens Šmit
Lipšćanska uniwersita njeje w Serbach jeno znata za to, zo někotryžkuli profesor tam hdys a hdys dwělomne rozsudy twori. Tež najwjetši dźěl serbskich maturantow to na studij do Lipska podawa. Druha najstarša uniwersita cyłeje Němskeje steji nimo wukubłanja wučerskeho dorosta a najwšelakorišeho repertoira fakultow we wosebitej měrje tež za sport. Pod NDRskim mjenom DHfK spěchuja na tamnišej fakulće za sportowe wědomosće tež dźensa hišće talenty w najwšelakorišich disciplinach. Nochcu pak so tule hłownje přichodnym wjesłowarjam, kanutam a lochkotoatletam Lipšćanskeje uniwersity wěnować, ale druhemu zajimawemu sportej.