Łužiscy hórnicy wodychnu – škitarjo wobswěta wobzamknjenja kritizuja

Berlin (dpa/SN/K). Kontrowersnych prašenjow w naležnosći změny energije hižo njeje. Na nócnym zeńdźenju su so němska zwjazkowa kanclerka Angela Merkel (CDU), hospodarski minister Sigmar Gabriel (SPD) a bayerski ministerski prezident Horst Seehofer (CSU) na rozrisanje w pakeće dojednali. Po nim je předwidźane, zawrěć hač do lěta 2020 brunicowe milinarnje z kapacitu 2,7 gigawattow, zo bychu so zaměry klimoweho škita docpěli. Kotre bloki to nastupa, pak njeje hišće wučinjene. Při wutwarje milinowodow ze sewjera na juh maja so w prěnim rjedźe kable pod zemju zasadźeć. Zo so nětko tola alternatiwny namjet zwoprawdźi, je wuspěch wobšěrneje prowuhloweje lobby w industriji, dźěłarnistwach a brunicowych krajach kaž Sakskej a Braniborskej.