Minister Martin Dulig Serbsku radu pozitiwnje překwapił
Drježdźany (SN/JaW). Turistiske tafle při awtodróze we Łužicy maja přichodnje dwurěčne, němsko-serbske, być. Z telej powěsću je wčera sakski statny minister za hospodarstwo, dźěło a wobchad Martin Dulig (SPD) čłonow rady za serbske naležnosće Sakskeje w Drježdźanch překwapił.
Kaž zdźěli předsydka rady Marja Michałkowa (CDU) na naprašowanje Serbskich Nowin je minister Dulig radu wo tym informował, zo je minjeny tydźeń w swojim ministerstwje podpisał změnu wukaza wo popisanju turistiskich taflow. We wotpowědnym pismje, kotrež je minister radźe předpołožił, je nětko rjadowane, zo maja turistiske tafle we Łužicy dwurěčne być. „To bě najlěpša powěsć dnja, wšako smy hižo wjacore lěta wo změnu tychle kriterijow wojowali. Nětkole je dwurěčnosć kruće zapisana a tuž móžemy wotnětka ze wšeho spočatka na to dźiwać“, praješe Michałkowa našemu wječornikej.
