Słowjenska prosy ćěkancow dla we wulkej nuzy EU wo pomoc
Berlin/Brüssel/Ljubljana (dpa/SN/K). Wšědne wobrazy w telewiziji su wutrobu lemjace, hdyž widźimy ćěkancow, mnozy z małymi dźěćimi, kak při chłódnym, dešćikojtym počasu hraničnu rěčku do Słowjenskeje, přeprěčeja – zdźěla samo bosy. Po tym zo bě Madźarska hranicu do Serbiskeje a Chorwatskeje zawrěła, spyta wjele tysac migrantow přez Słowjensku do srjedźneje Europy a Němskeje dóńć. Mały kraj je z tym dospołnje přežadany, a prosy tohodla EU wo pomoc. Nuznje su policajske mocy z druhich statow trěbne, dźensa w Ljubljanje zdźělichu. Do Słowjenskeje nawali so w běhu 24 hodźin něhdźe 12 500 ćěkancow. Kraj njemóže pak wšědnje wjace hač 2 500 zastarać.