Chorwatska a Słowjenska ćěkancow nětko z ćahami wozytej

Berlin/Ljubljana (dpa/SN/K). Kak sej z njepřestajnym nawalom ćěkancow radu dać, wo tym chcedźa kanclerka Angela Merkel (CDU), předsyda SPD Sigmar Gabriel a šef bayerskeje CSU Horst Seehofer kónc tydźenja radu składować. Sobotu zetka so Merkel z bayerskim ministerskim prezidentom, njedźelu ze swojim naměstnikom a hospodarskim ministrom. Jednać budu wo politice napřećo migrantam a wo kritiskim połoženju po- dłu hranicy k Awstriskej.

Nawal ćěkancow k awstrisko-němskej hranicy mjeztym dale traje. Wčera wječor je na wšěch 5 500 škit a wuchowa pytacych ludźi do Passauskeho regiona přišło. Ćežišća su gmejny Wegscheid, Achleiten a Simbach nad rěku Inn. Dźensa rano su jich z wosebitymi ćahami z Passauwa do druhich kónčin kraja dowjezli. Cyłkownje je drje wčera něšto mjenje migrantow dóšło, za to su so wuměnjenja za nich pohubjeńšili a jich zastaranje so poćežiło.