Kamjenc (SN/at). 48 wyšich měšćanostow, měšćanostow a wjesnjanostow Budyskeho wokrjesa je so ze „zasadnym wozjewjenjom“ nastupajo trajacy prud ćěkancow do Němskeje na zwjazkowu kanclerku Angelu Merkel (CDU) wobroćiło. Tekst nastajili běchu Kamjenski wyši měšćanosta Roland Dantz (njestronjan), Kinsporski měšćanosta Heiko Driesnack, Njeswačanski wjesnjanosta Gerd Schuster (wobaj CDU) a předsyda zarjadniskeho zwjazka Při Klóšterskej wodźe Měrko Domaška.
Podpisarjo lista „so přiběrajcy starosća, kak wotwobroćenje wot socialneho měra, wot nutřkowneje wěstoty a čłowjeskich hódnotow naš kraj wohroža“. Woni apeluja doraznje na zwjazkowe knježerstwo, zo by mjezu Němskeje zawěsćiło a so wo kontrolowane zapućowanje po płaćiwych zakonjach starało. Dale žadaja sej „jeničku zamołwitosć Zwjazka za to, přewjesć azylowe jednanje wot přiwzaća próstwy kač k rozsudej inkluziwnje konsekwentneho wotsunjenja“ kaž tež zarunać wšitke z tym zwisowace kóšty.
