Budyšin (AW/SN). Zaměry iniciatiwy za demokratisce legitimowane ludowe zastupnistwo Serbow Budyski wyši měšćanosta Alexander Ahrens (njestronjan) podpěruje. Tole zwurazni wón skupinje iniciatiwnikow pod nawodom jeje rěčnika dr. Měrćina Wałdy wčera na zetkanju w Budyskim běrowje SPD. Na nje bě zapósłanc SPD w Sakskim krajnym sejmje Harald Baumann-Hasske přeprosył.
Komunalny politikar Ahrens chce so bórze z wjacorymi nawodnymi Serbami wo naležnosćach Serbskeho sejma rozmołwjeć. Zdobom wón wo tym rozmysluje, hdy a w kotrej formje móhli so Budyscy měšćanscy radźićeljo tež wobšěrnje wo naležnosći wobhonić. Wón dowoli iniciatiwnikam tež, jich flajer „Je načasu samopostajowanje zwoprawdźić“ w Budyskim měšćanskim zarjadnistwje wupołožić.