Francoski premier: dalše atentaty su móžne

Paris/Berlin (dpa/SN/K). Francoska a z njej Europa, haj cyły swět su do dna trjechene z toho, štož běchu bjezbóžni terorisća teroristiskeje milicy Islamski stat (IS) pjatk wječor wěrjenjepodobneho a złóstniskeho w francoskej stolicy načinili. Dźensa připołdnju w dwanaćich su ludźo po cyłym kontinenće 129 smjertnych woporow nječłowjeskeho zachadźenja ISowcow z mjeńšinu mjelčenja wopominali, k čemuž běchu šefojo statow a knježerstwow krajow EU napominali. Wjace hač 350 wosobow poćerpje zranjenja, zdźěla jara ćežke.

Po sudźenju francoskeho premiera Manuela Vallsa přihotuje teroristiska milica IS dalše atentaty w europskich krajach. „Wěmy, zo IS nowe operacije planuje.“ Rozsudnje wón připowědźi „rozbijemy IS“. Francoske lětarstwo je z masiwnymi nalětami ke konteratace přešło, zdźěla dpa. Dźesać mašinow je z bombami komandownju IS, składy bróni a municije kaž tež wukubłanišćo zničiło.