Drježdźany (dpa/K/SN). Nahladnosć Sakskeje a jeje stolicy je po měnjenju ministerskeho prezidenta Stanisława Tilicha (CDU) nadpadow na ćěkancow a zjawow hidy na cuzych dla chětro wobškodźena. „Budźemy dołhi čas trjebać, zo bychmy tónle wobraz zaso skorigowali“, rjekny 56lětny politikar powěsćerni dpa.
Při tym móže so Sakska z cyle hinašimi wěcami hordźić, na přikład z bohatymi kulturnymi tradicijemi abo ze swojim sylnym hospodarstwom. „Dyrbimy so prócować, zo swoju tamnu stronu prezentujemy“, Tilich podšmórny. W druhich kónčinach Němskeje je tohorunja atakow na ćěkancow było. „Ale w Sakskej najprjedy, a Sakska ma Pegidu.“ Wonemu hibanju wón wumjetuje, zo situaciju přiwótřa. „Mamy skupinu ludźi, kotřiž wusywaja hidu a njepřećelskosć napřećo cuzym.“