Kriza ćěkancow dla bě wšitko přesahowaca tema na lětušim tradicionalnym zetkanju sakskeje FDP na Třoch kralow w Budyšinje. Tola tež wo druhich temach tam sobotu rěčachu.
Budyšin (SN/MkWj). Žurla Budyskeho Dźiwadła na hrodźe njebě runjewon přepjelnjena, jako so sobotu čłonojo sakskeje FDP tradicionalnje na Třoch kralow zetkachu. Wodźacy čłonojo pak běchu přitomni: krajny předsyda Holger Zastrow, generalny sekretar Torsten Herbst a něhdyši Kamjenski zapósłanc strony w Němskim zwjazkowym sejmje Reiner Deutschmann. Jako hłowny rěčnik wustupowaše lětsa Biskopičanski wyši měšćanosta, njestronjan Holm Große.