Připóznaće za skutkowanje Stanisława Tilicha
Stanisław Tilich je minjenu srjedu po dźewjeć lětach přewšo překwapjacy swój wotstup ze zastojnstwow krajneho předsydy CDU kaž tež ministerskeho prezidenta Sakskeje připowědźił. To ma so w decembrje stać. Jako naslědnika namjetowaše wón dotalneho generalneho sekretara sakskich křesćanskich demokratow Michaela Kretschmera. Kak su Serbja tejle powěsći přiwzali? Serbske Nowiny su so wobhonili.
Křesćan Buk z Drježdźan: Stanisław Tilich słuša jako demisionowany ministerski prezident Swobodneho stata Sakskeje bjezdwěla „k mužam wěčneho wopomnjeća“. Wšudźe je so wón jako syn našeho ludu wuznawał. Serbow njeje wón priwilegował, ale je nas po zakonju spěchował. Tež to je čwak jeho diplomatije.