Stuttgart (SN). Statne zrěčenje mjez mjeńšinu Sintow a Romow a zwjazkowym krajom Badensko-Württembergskej bu dźensa ponowjene. Před pjeć lětami su je prěni raz podpisali. Nimo zwyšenja spěchowanja na 700 000 eurow klětu a 721 000 eurow wot lěta 2020, bu zrěčenje tež wo 15 lět podlěšene. Runje tak bu stopnjowanje financneho spěchowanja wo 2,5 procentow na lěto wobzamknjene. Płaćić ma tole wot lěta 2020.

Krajny zwjazk Sintow a Romow w Badensko-Württembergskej, kotryž mjeńšinu zastupuje, chce swoje dźěłowe wobłuki nětko dale rozšěrić. Mjez druhim po­trjechi to kubłanske a kulturne poskitki za mjeńšinu kaž tež spěchowanje jeje rěče a kultury. Přez lětstotki njemějachu Sintojo a Romojo žanu městnosć, hdźež móhli swoju kulturu pěstować. Jich rěč hrozy samo wotemrěć. Pochad kultury a rěče je lědma znaty. Krajnemu zwjazkej je tuž wažne, za tym slědźić a stawizny z perspektiwy mjeńšiny wuswětleć.