27. politiska popjelna srjeda w Budyšinje tójšto ludźi přiwabiła

Budyšin (SN/MkWj). Tajku kopatu połnu drje wopytowarjo kóždolětneje politi­skeje popjelneje srjedy wjacezaměrowu halu na Budyskim Třělnišću hišće do­žiwili njejsu. Hač na poslednje městno wobsadźene běchu stólcy za blidami w hali, tež přihladowarska tribuna bě pjelnjena kaž hišće nihdy. Hłowny organizator mjeztym 27. zarjadowanja toho razu, serbski zapósłanc CDU w Sakskim krajnym sejmje Marko Šiman, móžeše spokojom być. Mjez politikarjemi, kotřiž su jeho přeprošenje do Budyšina sćě­howali, běchu prezident krajneho sejma Matthias Rößler runje tak kaž zapósłanc Europskeho parlamenta Herrmann Winkler a něhdyši sakski ministerski prezident Stanisław Tilich (wšitcy CDU), kotrehož Šiman serbsce witaše. Jako čestny hósć a swjedźenski rěčnik přichwatał bě minister za strowotnistwo Jens Spahn (CDU). Mjez hosćimi běštaj tež bywša zapó­słanča CDU w zwjazkowym sejmje Marja Michałkowa a zapósłanc CDU w krajnym sejmje Alojs Mikławšk.