AfD při europskich wólbach w Sakskej a Braniborskej masiwje přidobyła

Brüssel/Berlin (dpa/SN). Unija a SPD stej wólby Europskeho parlamenta nastupajo historiski debakl dožiwiłoj a miliony wolerjow na dobro Zelenych zhubiłoj. Ekologiska strona je SPD po wšej Němskej prěni króć z druheho městna wotstorčiła. Wulka koalicija ze zwjazkowej kanclerku Angelu Merkel (CDU) na čole je w dźeń a wjetšich wuskosćach. Tež w cyłoeuropskim měritku su křesćanscy a socialdemokraća hłosy přisadźili. Nacionalisća a populisća móžachu hłosy přidobyć. Za woprawdźity prawicarski přewrót pak njedosaha.

SPD a CDU/CSU njejsu při cyłoněmskich wólbach hišće ženje tak špatnje wotrěznyli, ani we wobłuku europskich ani wólbow zwjazkoweho sejma. Po dotalnym wuličenju hłosow drje wostanje unija najsylniša móc, sunje pak so na jenož hišće 28,9 procentow (EU 2014: 35,4 procenty/zwjazkowy sejm 2017: 32,9 procentow). Hišće hórši je wuslědk za SPD: Wona je z 15,8 procentami jenož hišće třeća najsylniša politiska móc (EU: 27,3 proc., zwjazkowy sejm 20,5 proc.). Porno tomu móžachu Zeleni swój podźěl podwojić a nažnjachu 20,5 procentow hłosow.