Jenož na 25 lět braniborskeho Serbskeho zakonja njezhladowali
Choćebuz (SN/at). Serbski zakoń je „wuraz braniborskeho zakładneho dorozumjenja serbskeje a mjeńšinoweje politiki“. To wuzběhny braniborska knježerstwowa społnomócnjena za naležnosće Serbow, statna sekretarka dr. Ulrike Gutheil (SPD), wčera na swjatočnosći w kafeteriji Delnjoserbskeho gymnazija w Choćebuzu składnostnje dweju róčnicow: 1994, před 25 lětami, je Krajny sejm Braniborskeje swój Serbski zakoń schwalił. Před pjeć lětami, w zwisku z prěnim nowelěrowanjom zakonja, zawjedźechu zastojnstwo, z kotrymž je Braniborska w mjeńšinowych prašenjach jasnje prezentniša. Dr. Gutheil funkciju tuchwilu wukonja.
Wšitcy rěčnicy rysowachu, kak na wšelakich runinach zakonski tekst ze žiwjenjom pjelnja. Tak skedźbni financny přirjadnik bjezwokrjesneho města Choćebuza dr. Markus Niggemann na to, zo njeje komuna tež w ćežkim času 1992, potajkim dwě lěće do wobzamknjenja Serbskeho zakonja, wutworjene połne dźěłowe městno społnomócnjeneho za serbske naležnosće ženje do prašenja stajała.