Michael Kretschmer wobdźělnikow wubědźowanja „Čiń sobu“ mytował
Drježdźany (SN/MiR). Prěnja etapa Sakskeho fondsa „Čiń sobu“ je zakónčena. Wčera přija dźěl dobyćerjow – jednotliwcy, towarstwa, zwjazki, komory, załožby, socialni nošerjo, šule, komunalne a wědomostne zarjadnišća – w Drježdźanskim hygienowym muzeju mytowanske wopisma. 1 520 projektowych idejow je dopokaz kreatiwity mocy inowacije we wuhlowych rewěrach, kotrež su wot strukturneje změny potrjechene. Jurorojo mějachu za štyri wobłuki ReWiR, MINT, Mobilita a Žiwa dwurěčnosć najlěpšich wuzwolić. Namjetowanych bě 613 projektowych idejow za myta we štyrjoch kategorijach. Sakska je lětsa 1,5 milionow eurow do projekta za wuhlowe regiony inwestowała, klětu chce to wospjetować. Serbskemu ludej přewostaja wona na tej dwě lěće po 200 000 eurach.